Böyük Britaniya səfirliyi Gürcüstanda bələdiyyə seçkiləri ilə bağlı qrant layihələrinin ləğv edildiyini açıqladı

"Bələdiyyə seçkilərinin şəffaflığı və rəqabətliliyinin dəstəklənməsi məqsədilə planlaşdırılan qrant layihələrinin ləğv edilməsinə məcbur qaldıq."

InterPress.ge xəbər verir ki, bu barədə Böyük Britaniyanın Gürcüstandakı səfirliyi bəyan edib.

Diplomatik nümayəndəliyin məlumatına görə, Gürcüstan hökuməti ilə müzakirələrdən sonra onlara bildirilib ki, “Qrantların təsdiqi proseduru haqqında” hökumət qərarı hələ tam formalaşmayıb. Buna görə də, hazırda qrantların təsdiqi ilə bağlı qərarların qəbul edilməsi üçün mexanizm və müddətlər mövcud deyil.

“Birləşmiş Krallıq vicdanla bir neçə layihə üzrə qrant təsdiqi üçün razılıq almağa çalışırdı. Bu layihələr vətəndaş cəmiyyətinin seçicilərin maarifləndirilməsi və vətəndaş nəzarəti yolu ilə seçkilərin monitorinqini həyata keçirməsini nəzərdə tuturdu. Qeyd olunmalıdır ki, bu fəaliyyətlər Mərkəzi Seçki Komissiyası tərəfindən də faydalı hesab olunmuşdu.

Təəssüf ki, yaranmış bu qeyri-müəyyənlik səbəbindən biz planlaşdırılan qrant təkliflərini ləğv etməyə məcburuq, hansı ki, bələdiyyə seçkilərinin şəffaflığını və rəqabətliliyini dəstəkləməyi nəzərdə tuturdu.

Həmçinin təəssüflə qeyd edirik ki, əvvəlki bələdiyyə seçkilərindən fərqli olaraq, bu dəfə hökumət hələ ATƏT/ODIHR-in müşahidə missiyasını dəvət etməyib və vətəndaşların seçkilərə nəzarət üçün zəruri fəaliyyətlərinin dəstəklənməsi baş vermir.

Peşəkar şəkildə hazırlanmış, beynəlxalq standartlara uyğun fəaliyyət göstərən müşahidəçilərin olmaması geriləmə kimi qiymətləndirilə bilər və Gürcüstanda demokratik proseslərin şəffaflığına ictimai etimadı azalda bilər.

Böyük Britaniya Gürcüstanda demokratik inkişafı necə dəstəkləyə biləcəyi barədə dialoqa hazır olduğunu bir daha bəyan edir və oktyabrda keçiriləcək bələdiyyə seçkilərinin obyektiv, peşəkar və şəffaf monitorinqinin dəstəklənməsi məqsədini daşıyan bu itirilmiş fürsətə görə təəssüf hissi keçirir”, – deyə səfirliyin bəyanatında bildirilir.