“İndi mübarizə apar, sabah gec ola bilər” – Batumidə Mzia Amaglobelinin məhkəməsi ərəfəsində aksiya keçirilib

“İndi mübarizə apar, sabah gec ola bilər” şüarı ilə Batumi Şəhər Məhkəməsinin qarşısında “Batumelebi” və “Netgazeti” nəşrlərinin təsisçisi Mzia Amaglobeliyə dəstək aksiyası keçirilib.

InterPress.ge xəbər verir ki, bugünkü məhkəmə proseslərində Amaglobelinin iki işi – inzibati və cinayət işləri üzrə dinləmələr nəzərdə tutulur.

Aksiya iştirakçılarının sözlərinə görə, Mzia Amaglobeli qanunsuz həbsdə saxlanılır və bu, rejimin sərbəst ifadə azadlığını boğmaq cəhdidir.

“Mzia Amaglobeli ikinci dəfə stiker yapışdırdığına görə mühakimə olunur. Rejim şəraitində yaşayırıq. Bu, Rusiyada olur – insanların sadə stikerə görə həbs olunduğu bir vəziyyət. Onlar ölkədə sərbəst və tənqidi düşüncəni yox etməyə çalışırlar”, – deyə iştirakçılar bildiriblər.

Məhkəməyə təqdim olunan inzibati iş bu ilin 11 yanvar tarixində Acarıstan Polis İdarəsinin qarşısında keçirilən etiraz aksiyası zamanı stiker yapışdırılması ilə bağlıdır.

Cinayət işi isə Mzia Amaglobeliyə qarşı Gürcüstan Cinayət Məcəlləsinin 353^1-ci maddəsi ilə – polis əməkdaşına hücum ittihamı üzrə aparılır.

Xatırladaq ki, Amaglobeli Batumidə keçirilən etiraz aksiyası zamanı əvvəlcə inzibati qaydada saxlanılmış, təxminən iki saat sonra sərbəst buraxılmışdı. Lakin azadlığa çıxdıqdan bir neçə dəqiqə sonra eyni yerdə – polis idarəsinin qarşısında yenidən həbs olunmuşdu.