Kobaxidze: Əsas prioritetimiz Aİ üzvlüyüdür – Gürcüstanın inteqrasiya yolu intensivləşdirilməlidir

"Ölkənin əsas prioriteti Avropa İttifaqına üzv olmaqdır."

InterPress.ge xəbər verir ki, bu barədə Gürcüstanın Baş naziri İrakli Kobaxidze Türkiyənin Antalya şəhərində keçirilən Diplomatiya Forumunda çıxışı zamanı bildirib.

Onun sözlərinə görə, müəyyən çətinliklərə baxmayaraq, Gürcüstanın Aİ-yə inteqrasiyası daha intensiv şəkildə həyata keçirilməlidir.

“Çox aydın baxışımız var – əsas prioritetimiz Aİ üzvü olmaqdır. Bu istiqamətdə müəyyən çağırışlar mövcuddur, lakin ümid edirik ki, ölkəmizdə və regionda, xüsusilə Ukraynada sülhün bərpası ilə Gürcüstanın inteqrasiya yolu daha intensiv davam edəcək,” – deyə Kobaxidze vurğulayıb.

Baş nazirin sözlərinə görə, inkişaf və dövlətlərarası münasibətlərin düzgün qurulması üçün əsas amil sülhdür.

“Regionda sülhün möhkəmləndirilməsinə diqqət yetirilməlidir. Məmnunuq ki, bu istiqamətdə Türkiyə ilə birgə çalışırıq – bu ölkə də sülh yönümlü baxışa malikdir. Gələcəkdə də bu sülh strategiyasını davam etdirəcəyik və diqqətimizi ölkənin, xüsusilə iqtisadiyyatın inkişafına yönəldəcəyik. Bu, Gürcüstanın əlaqəlilik imkanlarını və iqtisadi gücünü daha da artıracaq. Sülh və rifah hər kəsin diqqət etməli olduğu əsas hədəfdir,” – deyə Kobaxidze əlavə edib.