Vladimir Putin: "Ukraynada müvəqqəti idarəçiliyin tətbiqi demokratik seçkilərin keçirilməsinə imkan yaradacaq"

"Ukraynada müvəqqəti idarəçiliyin tətbiqi demokratik seçkilərin keçirilməsini və elə bir hökumətin formalaşmasını mümkün edəcək ki, onunla sülh danışıqları aparmaq və müvafiq sənədləri imzalamaq mümkün olsun."

InterPress.ge xəbər verir ki, bu barədə Rusiya prezidenti Vladimir Putin bəyanat yayıb.

Putinin sözlərinə görə, BMT-nin himayəsi altında Rusiya tərəfdaşları – ABŞ və Avropa ölkələri ilə birlikdə Ukraynada belə bir müvəqqəti idarəçiliyin tətbiqi məsələsini müzakirə etmək mümkündür.  

"Bunun məqsədi nədir? Demokratik seçkilərin keçirilməsi, səmərəli və xalqın etimadını qazanan bir hökumətin formalaşdırılması və daha sonra onlarla sülh sazişi ilə bağlı danışıqlara başlamaq, dünya tərəfindən tanınan, etibarlı və sabit sənədlər imzalamaq", – deyə Rusiya prezidenti vurğulayıb.  

O əlavə edib ki, bu, sadəcə mümkün variantlardan biridir.  

"Bu, yalnız bir variantdır və demirəm ki, başqa variantlar yoxdur", – deyə Putin bəyan edib.