“Starlink-i söndürsəm, Ukrayna ordusunun cəbhə xətti çökəcək”- Elon Maskdan qalmaqallı açıqlama

Elon Musk: “Ukrayna ordusunun dayağı Starlink-dir, onu söndürsəm, cəbhə çökəcək”

InterPress.ge xəbər verir ki, ABŞ hökumətinin Effektivlik Departamentinin (DOGE) rəhbəri və SpaceX-in təsisçisi Elon Mask Ukrayna müharibəsi ilə bağlı sosial platforma X-də növbəti qalmaqallı açıqlama verib.

Maskın sözlərinə görə, Ukraynadakı müharibə dərhal dayandırılmalıdır, çünki bu, ölkəni çıxılmaz duruma və məğlubiyyətə aparan bir prosesdir.

“Vladimir Putini Ukrayna məsələsinə görə, faktiki olaraq, fiziki döyüşə çağırmışam. Mənim Starlink sistemim Ukrayna ordusunun əsas dayağıdır. Əgər onu söndürsəm, bütün cəbhə xətti çökəcək”, – deyə Mask bildirib.

Amerikalı milyarder qeyd edib ki, uzun illər davam edən müharibə Ukraynanı çətin vəziyyətə salır və bunun tezliklə dayandırılması lazımdır.

“Məni ən çox narahat edən, illərdir davam edən və Ukraynanın mütləq məğlub olacağı bir dalana dirənmiş qırğındır. Bu müharibənin bitməsini istəyən hər kəs həqiqətən düşünən və anlayan insan olmalıdır. Müharibəni dayandıraq! Dərhal sülh!”, – deyə Mask vurğulayıb.

Maskın şirkəti SpaceX Ukraynaya müharibənin əvvəlindən Starlink peyk internet xidmətini təmin edib, bu da Ukrayna ordusuna böyük strateji üstünlük qazandırıb. Bununla belə, Musk bir neçə dəfə bildirib ki, onun texnologiyasının müharibənin gedişatını daha da qızışdırmaq üçün istifadəsi onu narahat edir.