Fransız avroparlamentari: “Gürcüstanın yeri Avropa İttifaqındadır, amma onun maraqları qorunmalıdır”

"Gürcüstan Avropa sivilizasiyasının bir hissəsidir və bununla bağlı heç kimdə şübhə yoxdur. Ölkənin Avropa İttifaqına (Aİ) üzv olub-olmayacağı isə hələ də sual altındadır."

InterPress.ge xəbər verir ki, bu barədə Fransalı avroparlamentari Tyeri Mariani Brüsseldə “Interpressnews” agentliyinin xüsusi müxbirinə açıqlamasında bildirib.

Onun sözlərinə görə, Gürcüstanın Aİ-də yerinin olduğunu düşündüyünü, lakin ölkənin maraqlarının qorunmalı olduğunu vurğulayıb.

“Sizin yeriniz Avropa ailəsindədir, amma bu ailədə biz hər bir üzvün seçiminə hörmət etməliyik. Gürcüstan hazırda coğrafi baxımdan çox çətin vəziyyətdədir”, – deyə Mariani bildirib.

O, rəsmi Brüsselin mövqeyi ilə razı olmadığını və Aİ-nin üzv və namizəd ölkələri bəzi qərarları qəbul etməyə məcbur etməsinin düzgün yanaşma olmadığını qeyd edib:

“Mən Brüsselin üzv ölkələrə göstəriş verməsinə qarşıyam. Moskva bir vaxtlar eyni şeyi edirdi, hətta bu, milli maraqlara zidd olsa belə. Bu gün Avropa Parlamentinin çox qəribə baxışları var. Onlar düşünürlər ki, Avropa Komissiyasının göstərişlərinə bütün ölkələr əməl etməlidir. SSRİ-də də belə idi”, – deyə avroparlamentar əlavə edib.

“Gürcüstanın Rusiya ilə münasibətləri fərqlidir”

Mariani Gürcüstanda 2022-ci ilin iyulunda rəsmi səfərdə olduğunu və orada keçirdiyi görüşləri xatırladıb. O bildirib ki, Gürcüstanın o vaxtkı prezidenti Salome Zurabişvili Rusiyaya qarşı sanksiyalar tətbiq etməyə hazır olduğunu söyləsə də, Baş nazir və parlament üzvləri ölkənin coğrafi vəziyyətini nəzərə alaraq Moskva ilə əlaqələri tamamilə kəsməyin mümkün olmadığını bildiriblər.

“Siz Avropa İttifaqında olmalısınız, amma Aİ sizin maraqlarınıza hörmət etməlidir. Türkiyə və Rusiya arasında yerləşən bir ölkə fərqli yanaşma tələb edir”, – o vurğulayıb.

“Baltikyanı ölkələrin sanksiya qərarı demokratiyaya hörmətsizlikdir”

Mariani həmçinin Baltikyanı ölkələrin Gürcüstan hakimiyyətinin bəzi nümayəndələrinə qarşı sanksiyalar tətbiq etməsini tənqid edib.

“Bu qərar məni şoka saldı. Baltikyanı ölkələr bu halda demokratiyaya hörmət etmirlər. Əgər onlar həqiqətən Gürcüstana kömək etmək istəyirlərsə, sanksiyalar tətbiq etmək əvəzinə, çıxış yolu tapmağa kömək etməlidirlər. Daha çox əməkdaşlıq lazımdır, yoxsa sanksiyalar. Düşünürəm ki, sizin baş naziriniz və ya prezidentiniz Talinə getmədən də yaşaya bilər”, – deyə o əlavə edib.