Mixail Saakaşvili: “Məni sıradan çıxarmaq istəyirlər, çünki onların planlarını pozmuşam”
"Mənə qarşı qaldırılan cinayət işi siyasi sifarişin nəticəsidir. Onun sözlərinə görə, bu prosesin məqsədi onun nüfuzunun zəiflədilməsi və Kremlin maraqlarına xidmət edən şəxslərin gücləndirilməsidir."
InterPress.ge xəbər verir ki, bu barədə Gürcüstanın üçüncü prezidenti Mixail Saakaşvili məhkəmədə çıxışı zamanı bildirib.
“2014-cü ildə Ukrayna Prezidentinin müşavirlər şurasının sədri oldum və bir neçə gün sonra mənə qarşı cinayət işi açıldı. Heç kim mənə deyə bilməz ki, İvanişvili özü buna cəsarət etdi. Gürcüstandan on dəfə böyük bir ölkənin region rəhbərinə və keçmiş prezidentinə qarşı cinayət işinin açılması, əlbəttə ki, tapşırıq və göstəriş idi. Çünki mən onun sahibləri üçün böyük maneəyə çevrilmişdim”, – deyə Saakaşvili məhkəmə iclasında vurğulayıb.
Saakaşvili qeyd edib ki, bu işin yekunlaşdırılması üçün məhz Rusiyanın Ukraynaya hücumunun üçüncü ildönümü gözlənilib ki, bu da Rusiyanın mediasında geniş qeyd olunsun.
“Siyasi proses olduğuna dair heç bir şübhə yoxdur. Xronologiyaya baxmaq kifayətdir. 2014-cü ildə Ukraynanın Prezidentinin müşavirlər şurasının sədri oldum və dərhal bu iş açıldı. 2015-ci ildə isə Odesa vilayətinin qubernatoru təyin olundum. Bu, Rusiyanın Odesanı işğal etməyə cəhd etdiyi dövr idi və mən onların qarşısında dayandım. Və nə baş verdi? Qubernator təyin olunandan bir neçə gün sonra Gürcüstanda mənə qarşı həbs qərarı çıxarıldı”, – deyə o əlavə edib.
“İvanişvili heç vaxt özü belə qərar qəbul etməzdi. Bu, ona verilmiş tapşırıq idi. Çünki mən onun sahiblərinin planlarını pozurdum. Bu prosesin indiki mərhələdə yekunlaşdırılması da məhz Rusiyanın Ukraynaya hücumunun üçüncü ildönümünə təsadüf edir ki, Rusiya mediasında bunu təbliğ edə bilsinlər”, – deyə o vurğulayıb.
Saakaşvili əlavə edib ki, hazırkı Gürcüstan hökuməti onun prezident olduğu dövrlə müqayisədə dörd dəfə artıq büdcə vəsaiti xərcləyir.
“Bu hökumət dörd dəfə çox xərcləyir, nəinki mənim dövrümdə. Ancaq onların xərclərinin detalları məxfi saxlanılır, çünki əsas məqsəd məni günahlandırmaqdır. Onlar həqiqətən də əyləncələrə, lazımsız əşyalara, mənasız tədbirlərə milyonlarla pul xərcləyirlər. Mən isə cəmi bir müasir rəsmin alınmasına görə günahlandırıldım. O rəsmi evimə aparmadım, o, hələ də Prezident Sarayında asılıdır”, – deyə Saakaşvili bildirib.
O, həmçinin ABŞ-ın keçmiş prezidenti Donald Trampın onun ünvanına dediklərini də xatırladıb. “Donald Tramp məni korrupsiyaya qarşı mübarizə aparan reformator adlandırırdı”, – deyə o əlavə edib.
Saakaşvili çıxışının sonunda bildirib ki, “Gürcüstan azad olacaq, hətta bu, mənim həyatım bahasına başa gəlsə belə. Biz bu mübarizədə qalib gələcəyik!”
