Levan Maçavariani: "Gürcüstan '3+3' formatında Rusiya ilə eyni masaya oturmayacaq"

"Bu formatda Rusiya iştirak edir və Rusiya bizim ərazilərimizi işğal edib."

InterPress.ge xəbər verir ki, bu barədə "Gürcü Arzusu"nun deputatı Levan Maçavariani, Rusiya Xarici İşlər Naziri Sergey Lavrovun "Gürcüstanın '3+3' formatında həmişə yeri olacaq" bəyanatına cavab olaraq deyib.

O, bildirib ki, Gürcüstan Rusiyanın iştirak etdiyi bu formatda yer almayacaq.

"Təbii ki, bu rejimdə biz Rusiya ilə heç bir masa arxasında oturmayacağıq. Nə diplomatik münasibətlərimiz var, nə də başqa formada əlaqələrimiz. Əvvəlcə biz öz ərazi bütövlüyümüz məsələsini həll etməliyik, bundan sonra hansısa formatla bağlı müzakirə aparmaq mümkündür," – deyə Maçavariani vurğulayıb.

Maçavariani həmçinin ABŞ Prezidenti Donald Trampın Ukrayna Prezidenti Volodimir Zelenski ilə bağlı son açıqlamalarına da münasibət bildirib.

"Mən Zelenskinin diktator olub-olmaması barədə mühakimə yürütməyəcəyəm, bu, mənim qiymətləndirəcəyim məsələ deyil. Lakin cənab Trampın fikrinə qatılıram ki, Zelenski müharibədən yayına bilərdi. Tramp artıq açıq şəkildə bildirir ki, Ukrayna bu münaqişədən qaça bilərdi, sadəcə böyük oyunçular onu cəsarətləndirdilər və dəstəklədilər. Bu müharibədən qaçmaq lazım idi," – deyə Maçavariani bildirib.