Mdinaradze Salome Zurabişviliyə yumurta atılmasına münasibət bildirib

"Bu cür münasibətin yaranmasında müxalifətin də payı var."

InterPress.ge xəbər verir ki, bu barədə Parlament çoxluğunun lideri Mamuka Mdinaradze, Gürcüstanın 5-ci prezidenti Salome Zurabişviliyə hava limanında yumurta atılması ilə bağlı sualları cavablandırarkən deyib.

"Nika Qvaramiya və onun kimiləri siyasətçilərə və ictimai şəxslərə qarşı bu pis münasibətin yaşıl işığını yandırdılar. Təəssüf ki, indi də bunun nəticəsini görürlər. Nə əkdilərsə, onu da biçdilər," – deyə Mdinaradze vurğulayıb.

O əlavə edib ki, bütün mənfi hərəkətlər cinayət sayılmır və hüquqi qiymətləndirmə yalnız qanunvericiliyə əsasən aparılmalıdır.

"Dünən bu, ifadə azadlığı kimi qiymətləndirilirdi, bu gün isə... Nika Qvaramiya özü belə deyirdi. İndi isə bunun cinayət olub-olmaması başqa məsələdir. Bütün pis hadisələr cinayət deyil. Mənəvi baxımdan yanlış ola bilər, lakin cinayət yalnız Cinayət Məcəlləsində göstərilən hallardır. Digər heç bir şey cinayət sayıla bilməz. Lakin bu hadisə hüquq pozuntusudurmu, bunu müəyyənləşdirmək mənim işim deyil, çünki mən bu məsələyə siyasi yanaşıram," – deyə Mdinaradze bildirib.

Xatırladaq ki, bundan əvvəl "Gürcüstan üçün Gaxariya" partiyasının lideri Giorgi Gaxariya da Tbilisi Beynəlxalq Hava Limanında yumurta hücumuna məruz qalmışdı. Eyni hal Salome Zurabişvili Münhen konfransından qayıdarkən də baş verib. Hadisəyə dair görüntülər sosial şəbəkələrdə yayılıb. Zurabişvili insidentlə bağlı rəsmi şikayət verib və istintaqın aparılmasını tələb edib.