Şalva Papuaşvili: “Əgər qanunu pozmağa cəsarətiniz çatırsa, məsuliyyəti də eyni cəsarətlə qəbul edin”

Qanun pozan şəxslər məsuliyyətdən yayınmağa çalışmamalıdır və əgər parlamentin istintaq komissiyası onları çağırırsa, orada iştirak etməlidirlər.

InterPress.ge xəbər verir ki, bu barədə Parlamentin sədri Şalva Papuaşvili jurnalistlərə açıqlamasında bildirib.

“Əgər kimsə qanunu pozmağa cəsarət edirsə, onda onun məsuliyyətini daşımağa da hazır olmalıdır. Qanunu pozanlar sonra şikayətlənməsinlər ki, niyə barələrində cinayət işi açılıb. Parlamentin istintaq komissiyası səni çağırırsa, getməlisən. Əks halda, bu, cinayət məsuliyyətinə səbəb olacaq!” – deyə Papuaşvili vurğulayıb.

O əlavə edib ki, hər kəs qanuna riayət etməli və məsuliyyətdən yayınmamalıdır.

“Problem təkcə qanunun pozulması deyil. Hər bir insan azaddır və qanunu pozmaq, cinayət törətmək onun şəxsi seçimidir. Lakin bəzi insanlar elə düşünür ki, qanunu poza, cinayət törədə bilərlər və buna görə heç bir məsuliyyət daşımayacaqlar. Əgər qanunu pozmağa hazırsınızsa, onda məsuliyyətə də hazırsınız. Bu qədər sadədir. Xarici himayədarlara məktub yazmaq və bunun siyasi təqib olduğunu iddia etmək yerinə, məsuliyyəti qəbul etsinlər!” – deyə parlament sədri bildirib.

Qeyd edək ki, parlamentdə “Gürcü Arzusu” partiyasının təşəbbüsü ilə yaradılmış müvəqqəti istintaq komissiyası keçmiş hakimiyyətin - “Vahid Milli Hərəkat”ın bir sıra keçmiş vəzifəli şəxslərini dindirilməyə çağırıb.