Avropa Parlamenti Gürcüstanın siyasi vəziyyətinin pisləşməsi ilə bağlı qətnamə qəbul etdi
Avropa Parlamenti Gürcüstandakı siyasi vəziyyətin daha da pisləşməsi ilə bağlı qətnaməni qəbul edib.
InterPress.ge xəbər verir ki, qətnaməni 400 deputat dəstəkləyib, 63 deputat əleyhinə səs verib, 81 nəfər isə bitərəf qalıb.
Qətnamənin müəllifləri Avropa Parlamentinin beş əsas siyasi qrupundan – "Avropa Xalq Partiyası", "Sosial-Demokratlar", "Mühafizəkarlar və İslahatçılar", "Yenilənən Avropa" və "Yaşıllar" – olan 57 deputatdır.
Qətnamədə Avropa Parlamenti:
"Gürcü Arzusu" hakimiyyətini və rəsmi şəxslərini tənqid edir və onları dinc etirazçılara, siyasi müxalifətə və media nümayəndələrinə qarşı repressiyaları dayandırmağa çağırır;
Gürcüstan hakimiyyətinin fundamental azadlıqları, insan hüquqlarını və beynəlxalq öhdəliklərini pozduğunu vurğulayır;
Gürcüstanın "Gürcü Arzusu" tərəfindən ələ keçirilmiş bir dövlət olduğunu bildirir və 2024-cü il 26 oktyabr seçkilərinin saxtalaşdırıldığını əsas gətirərək, hazırkı hökuməti qeyri-legitim hesab edir;
Beynəlxalq ictimaiyyəti "Gürcü Arzusu"nun hakimiyyətini tanımamağa və onu boykot etməyə çağırır;
Prezident Salome Zurabişvilini Gürcüstanın legitim prezidenti və Gürcü xalqının nümayəndəsi kimi tanıyır.
Yeni seçkilər və sanksiya tələbləri:
Avropa Parlamenti Gürcüstandakı siyasi və konstitusiya böhranının yalnız yeni parlament seçkiləri yolu ilə həll oluna biləcəyini bildirir və yaxın aylarda ölkədə daha şəffaf seçkilərin keçirilməsini tələb edir.
Qətnamədə:
Aİ rəsmiləri və üzv dövlətlər Gürcüstanda yeni seçkilərin keçirilməsini tələb etməyə və gələcək əməkdaşlığı bu seçkilərin keçirilməsinə bağlamağa çağırılır;
Xüsusilə Bidzina İvanişvili, onun ailə üzvləri və şirkətləri daxil olmaqla, Gürcüstanın siyasi proseslərinə mənfi təsir göstərən şəxslərə qarşı sanksiyalar tətbiq olunması tələb edilir;
Fransa hökumətindən Bidzina İvanişvilinin "Şərəf Legionu" ordeninin geri alınması və ona qarşı fərdi sanksiyaların tətbiqi istənilir;
Avropa İttifaqı və üzv ölkələrə Gürcüstan hökumətinin əsas fiqurlarına, o cümlədən baş nazir İrakli Kobaxidze, parlament sədri Şalva Papuaşvili, Daxili İşlər naziri Vaxtanq Qomelauri, Tbilisi meri Kaxa Kaladze və "Gürcü Arzusu"nun lideri İrakli Qaribaşviliyə qarşı fərdi sanksiyalar tətbiq etmələri tövsiyə olunur.
Mediaya və hüquq-mühafizə orqanlarına qarşı tədbirlər:
Avropa Parlamenti hökumətyönlü media sahiblərinə, siyasi sifarişli qərarlar çıxaran hakimlərə və hüquq-mühafizə orqanlarının nümayəndələrinə qarşı da sanksiyaların tətbiq olunmasını tələb edir. Buraya "İmedi TV", "Post TV" və "Rustavi 2" daxil olmaqla, dezinformasiya yaymaqda ittiham olunan media orqanları da daxildir.
Bundan əlavə, Avropa Parlamenti:
Gürcüstanın vizasız rejiminin yenidən nəzərdən keçirilməsini və demokratik dəyərlərə əməl olunmadığı təqdirdə bu rejimin dayandırılması məsələsinə baxılmasını təklif edir;
28 noyabr 2024-cü ildən bəri etirazçılara qarşı zorakılıq tətbiq edən Gürcüstan hakimiyyətini pisləyir;
Siyasi məhbusların, o cümlədən jurnalist Mzia Amaglobelinin dərhal azad edilməsini tələb edir;
Keçmiş Baş nazir Giorgi Qaxariyanın döyülməsi və hospitalizasiya olunmasını, həmçinin 2 fevral 2025-ci ildə müxalifət liderləri Nika Melia və Gigi Uqulavanın həbsini pisləyir;
12 yanvar 2025-ci ildə Batumidə müxalifət lideri Elene Xoştarianın saxlanılmasını xatırladır.
Bu qətnamə Avropa Parlamenti və Aİ-nin Gürcüstandakı siyasi böhrana dair narahatlığını bir daha təsdiqləyir və ölkənin demokratik istiqamətə yönəlməsi üçün beynəlxalq təzyiqi artırmağı hədəfləyir.
