Avropa İttifaqının Gürcüstandakı səfiri: "Gürcüstan çox dərin siyasi böhran içərisindədir"

Gürcüstan çox dərin siyasi böhran içərisindədir, iki aydır ki, xalq küçələrə çıxır və demokratik, avropalı gələcək tələbi ilə etiraz edir. Bu çətin vəziyyətdən çıxış yolunu gürcü xalqı tapmalıdır.

InterPress.ge xəbər verir ki, bunu Avropa İttifaqının Gürcüstandakı səfiri Pavel Hərçinski jurnalistlərə bildirib. 

Onun sözlərinə görə, Avropa İttifaqı Gürcüstanın uğur qazanmasını həqiqətən istəyir:

"Biz Gürcüstana namizəd statusunu verməyə qərar verdik və ümid edirik ki, Gürcüstan digər namizəd ölkələrə qoşulacaq və mümkün qədər tez Avropa İttifaqının tamhüquqlu üzvü olacaq. Lakin namizəd statusu verildikdən sonra Gürcüstanda bir çox neqativ hadisələr baş verdi. Son bir neçə ayı nəzərdən keçirsəniz, vəziyyət daha da pisləşdi. Mən bunu Avropa İttifaqının səfiri olaraq deyirəm, inteqrasiya məsələlərində ən aşağı nöqtədəyik. Beləliklə, bu dərin sosial və siyasi böhrandan necə çıxacağına gürcülər qərar verməlidir. Verə biləcəyim tövsiyə dialoqdur. İdarəetmə, bu vəziyyətdən çıxış yolu tapmaq üçün əlavə məsuliyyət daşıyan tərəf olaraq, xalqla danışmağa başlamalıdır, küçələrə çıxan və özləri və uşaqları üçün demokratik və avropalı gələcək tələb edən insanları görməməzliyə vurmamalıdır", - deyə səfir qeyd edib.