Gürcüstanla bağlı son hadisələr Brüsseldə Xarici İşlər Şurasının gündəminə daxil edildi

Sabah Brüsseldə Avropa İttifaqının Xarici İşlər Şurasının iclası keçiriləcək. İclasda digər məsələlərlə yanaşı, son vaxtlar Gürcüstanda baş verən hadisələr də müzakirə olunacaq. 

InterPress.ge xəbər verir ki, bu barədə Avropa Şurası məlumat yayıb.

Məlumata görə, Avropa İttifaqının xarici işlər nazirləri Ukraynanın xarici işlər naziri Andriy Sibiga ilə video konfrans vasitəsilə qeyri-rəsmi fikir mübadiləsindən sonra Ukraynaya qarşı Rusiyanın təcavüzünü müzakirə edəcəklər.

 

Bununla yanaşı, Xarici İşlər Şurası Avropa İttifaqı ilə ABŞ arasında münasibətləri də müzakirə edəcək. Nazirlər həmçinin Yaxın Şərqdə, o cümlədən Suriyada son vaxtlar baş verən hadisələri nəzərdən keçirəcəklər.

“Xarici İşlər Şurası mövcud məsələləri nəzərdən keçirəcək, son hadisələrə və təhlükəsizlik, müdafiə sahəsində sürətlə dəyişən vəziyyətə diqqət yetirəcək. Bu bənd çərçivəsində nazirlər Moldova və Gürcüstanda baş verən hadisələrə də toxunacaqlar”, - deyə məlumatda qeyd olunub.

Xarici İşlər Şurasının iclasına Avropa İttifaqının xarici işlər və təhlükəsizlik siyasəti məsələləri üzrə ali nümayəndəsi Kaya Kallas rəhbərlik edəcək.