Ermənistan hökuməti Aİ-yə üzvlük prosesinin başlanması ilə bağlı qanun layihəsini təsdiqləyib
Ermənistan hökuməti “Ermənistan Respublikasının Avropa İttifaqına qoşulması prosesinin başlanması haqqında” qanun layihəsini təsdiqləyib.
InterPress.ge xəbər verir ki, bu barədə yerli KiV məlumat yayıb.
Məlumata görə, məsələni bu gün keçirilən iclasda xarici işlər naziri Ararat Mirzoyan təqdim edib.
“Son illər Ermənistan və Avropa İttifaqı arasında kifayət qədər gərgin və dinamik əlaqələr mövcuddur. Avropa İttifaqı dəfələrlə Ermənistanda demokratiyaya güclü siyasi dəstəyini ifadə edib. Mən Aİ-nin mülki monitorinq missiyasının yerləşdirilməsini nəzərdə tuturam. Avropa İttifaqı da Ermənistanın iqtisadi sabitliyinin möhkəmləndirilməsinə kömək etmək istəyini ifadə edib. Aydındır ki, Avropa İttifaqının çox zəngin demokratik ənənələri, güclü demokratik təsisatları, azad rəqabət mühiti, müasir iqtisadiyyatı və inkişaf etmiş elmi var”, - deyə Ermənistanın xarici işlər naziri bildirib.
Onun sözlərinə görə, Ermənistanın baş naziri Avropa Parlamentində bəyan edib ki, Ermənistan Avropa İttifaqının mümkün hesab etdiyi qədər Avropa İttifaqı ilə yaxınlaşmağa hazırdır.
“Biz bunun mümkün olduğuna dair əlamətləri də gördük. Mən viza rejiminin liberallaşdırılması prosesinin başlanmasını və Avropa İttifaqı ilə istifadə olunan və ya müzakirə edilən bir sıra digər alətləri nəzərdə tuturam”, - deyə Ararat Mirzoyan bildirib.
