Müdafiə Nazirliyi Marneulidə əsgərin ölümü ilə bağlı bəyanat yaydı

Müdafiə Nazirliyi Marneuli hərbi bazasında əsgərin ölümü ilə bağlı bəyanat  yayıb.

InterPress.ge xəbər verir ki, qurumdan verilən məlumata görə, hadisə ilə bağlı Cinayət Məcəlləsinin 115-ci maddəsinin birinci hissəsi ilə cinayət işi açılıb.

“Müdafiə Nazirliyi uzunmüddətli hərbi qulluqçu Ziyəddin Araz oğlu Məmmədovun vəfatından kədərləndiyini bildirir və mərhumun ailəsinə başsağlığı verir. Faktla bağlı Müdafiə Nazirliyinin Hərbi Polis İdarəsində Cinayət Məcəlləsinin 115-ci maddəsinin 1-ci hissəsi ilə araşdırma başlanılıb. İstintaq çərçivəsində bütün zəruri prosessual və istintaq hərəkətləri həyata keçirilir”, - Müdafiə Nazirliyinin yaydığı məlumatda deyilir.