Kaxa Kaladze: Ümid edirəm ki, Avropa İttifaqı ilə danışıqlar açılacaq

Avropa İttifaqının Gürcüstana təqdim etdiyi doqquz bəndlik plan bir neçə gün ərzində əsaslı şəkildə həyata keçiriləcək.

InterPress.ge xəbər verir ki,bu barədə Tbilisi meri Kaxa Kaladze jurnalistlərin müvafiq sualına cavab olaraq bildirib.

Kaladze ümid etdiyini bildirir ki, Avropa İttifaqı ilə danışıqlar açılacaq və bu faktdan namizəd statusunda olduğu kimi istifadə edilməyəcək.

“Danışıqların bir hissəsi Avropa İttifaqı ilə Assosiasiya Sazişində öz əksini tapıb. Ölkə doqquz bənddən ibarət fəaliyyət planı təqdim edib və bu plan bir neçə gün ərzində tam şəkildə həyata keçiriləcək. Təbii ki, danışıqların açılması üçün hökümət hər şeyi edəcək. Biz bütün ölkələri - Ukraynanı, Moldovanı bütün göstəricilərə görə xeyli qabaqlayırıq. Çox ümid edirəm ki, danışıqlar açılacaq və bu faktdan namizəd statusunda olduğu kimi istifadə olunmayacaq - ölkəni şantaj edirdilər, bu, çox ağır idi. Ümid edirəm ki, oxşar münasibət olmayacaq”, - deyə Kaxa Kaladze bildirib.

Onun sözlərinə görə, ölkənin Avropaya inteqrasiya yolunda əldə etdiyi bütün uğurlar 2012-ci ildən sonrakı dövrlə bağlıdır.

“Gürcüstan hökuməti növbəti addımlar atmaq üçün hər şeyi edir. Mən bunu dəfələrlə demişəm və bir daha təkrar edirəm: əgər ölkə Avropaya inteqrasiya yolunda hansısa uğur qazanıbsa, bu, ölkəmizin əhalisi ilə birlikdə “Gürcü arzusu – Demokratik Gürcüstan”ın böyük xidmətidir. Bütün uğurlar 2012-ci ildən sonrakı dövrlə bağlıdır. Danışıqların açılışı üçün təqdim olunan doqquz bənddən ibarət plan əsaslı şəkildə həyata keçiriləcək. Ümid edirəm ki, namizəd statusunda olduğu kimi belə ədalətsiz qərar qəbul edilməyəcək”, - deyə Kaxa Kaladze bildirib.