Yaydan etibarən Gürcüstanda avtomobilərin qiymətinin artacağı gözlənilir

“Maşının qiymətləri yaydan artacaq, əgər əvvəllər bir hissəsinin rənglənməsi 70 lari idisə, indi 200 laridir”.

InterPress.ge xəbər verir ki, bu barədə “Dove Line” avtomobil idxalı şirkətinin nümayəndəsi Caba Qoqinaşvili məlumat verib.

Rustavi avtomobil bazarında mövcud vəziyyətə və bazar tendensiyalarına gəlincə, Caba Qoqinaşvili “Business Press News”a müsahibəsində deyib ki, cari aylar həm qiymətlər, həm də müştərilər baxımından çox qeyri-sabitdir, lakin yazın gəlişi ilə vəziyyət yaxşılaşacaq və qiymət yaydan artacaq.

“İndi vəziyyət kifayət qədər qeyri-sabitdir, yanvar-fevral aylarında da bazar qeyri-sabit olub və demək olar ki, həmişə belə olur. Havalar yaxşılaşdıqca tələbatın artacağını gözləyirik ki, bu da avtomatik olaraq avtomobillərin qiymətlərinin artmasına səbəb olacaq. Bu, Qazaxıstan və Qırğızıstandan avtomobillərin yaz-yay aylarında daha çox gətirilməsi ilə izah olunur, çünki orada hava kifayət qədər sərtdir, hətta mart və aprel aylarında da qar ola bilər. Onu da nəzərə almaq lazımdır ki, yay aylarında avtomobillərdə çatışmazlıq qeydə alınır, tələbat isə yüksək olur ki, bu da qiymətin artmasına səbəb olur”, - “Dove Lines” şirkətinin nümayəndəsi bildirib.

O qeyd edib ki, gürcü istehlakçı tez-tez qiymət artımından narazıdır, amma əslində qiymət artımının nədən ibarət olduğunu, həm avtomobil hissələrinin, həm də onun təmiri xərclərinin bahalaşdığını düşünmür.