Faiq Quliyev səfirlikdə davam edən prezident seçkiləri ilə bağlı açıqlama verdi

Fevralın 7-nə təyin olunmuş növbədənkənar Azərbaycan Respublikası Prezident seçkiləri ilə əlaqədar Azərbaycanın Gürcüstandakı səfirliyində və Batumidə seçki məntəqələri təşkil olunub.

InterPress.ge-nin xəbərinə görə, səsvermə prosesi Tbilisi vaxtı ilə saat 08:00-da başlayıb.

Səfir Faiq Quliyevin sözlərinə görə, səfirlikdəki seçki məntəqəsi seçicilərin sərbəst və qərəzsiz səsverməsini təmin etmək üçün lazımi avadanlıqlarla təchiz olunub. 

"Saat 15:00-a olan məlumata görə, siyahıda olan Azərbaycan vətəndaşlarının 54% -i səsvermə hüququndan istifadə ediblər. Seçicilər böyük aktivlik nümayiş etdirirlər", -deyə səfir bildirib.

Səfir qeyd edib ki, seçki siyahısında 66 nəfər var ki, onlar arasında 18 yaşına çatmış və ilk dəfə səsvermə hüququndan istifadə edən 6 nəfər var. Həmçinin səs verənlər arasında 1937-ci il təvəllüdlü şəxs də var.

Onun sözlərinə görə, seçki məntəqəsi saat 19:00-a kimi açıq olacaq.

Məlumat üçün bildirək ki, növbədənkənar prezident seçkiləri ilə əlaqədar dünyanın 37 ölkəsində 49 seçki məntəqəsi yaradılıb. Onlardan ikisi Gürcüstan ərazisindədir.