Marneulidə 20 Yanvar - 9 Aprel faciələrinə həsr olunmuş anım tədbiri keçirilib

Yanvarın 16-da Marneulidə 20 Yanvar faciəsinin isə 34-cü il dönümünə həsr olunmuş 20 Yanvar - 9 Aprel faciələrinə həsr olunmuş “Milli Dirəniş və Azadlığa Gedən Yol” adlı sərgi və “Unutsaq-unudularıq” mövzusunda anım tədbiri keçirilib.

InterPress.ge xəbər verir ki, tədbir  "Azərbaycan Evi" nin təşkilatçılığı ilə baş tutub.

 Tədbirdə əvvəlcə şəhidlərimizin xatirəsi bir dəqiqəlik sükutla yad olunub.

Marneulidəki “Azərbaycan Evi”nin direktoru Məhəbbət İmanov Azərbaycanın və Gürcüstanın müstəqillik uğrunda mübarizə tarixindən söz açıb, keçmiş sovet imperiya qüvvələrinin 1989-cu il aprelin 9-da Tbilisidə, 1990-cı il yanvarın 20-də Azərbaycanda törətdiyi qırğınların əsas səbəblərindən danışaraq bildirib ki, bildirib ki, ölkələrimizin azadlığı uğurunda canlarından keçən qəhramanlar heç bir zaman unudulmur.

Azərbaycanın Gürcüstandakı səfirliyinin müşaviri Eldar Bayramov çıxışında bildirib ki, sovet imperiya qüvvələrinin bu qırğınları törətməkdə məqsədi hər iki xalqın azadlıq və müstəqillik uğrunda mübarizə əzmini qırmaq olub: “Lakin onlar öz istəklərinə nail ola bilməyiblər. Azərbaycan və gürcü xalqları öz qanları bahasına yenidən müstəqilliyinə qovuşublar”.

Müşavir Azərbaycanın yenidən müstəqilliyinə qovuşmasında, dövlət müstəqilliyinin bərpasında Ümummilli Lider Heydər Əliyevin rolunu xüsusi qeyd edib. Bildirib ki, Ulu Öndər, dünyaşöhrətli siyasi və dövlət xadimi Heydər Əliyev 1990-cı ilin yanvar qırğınından dərhal sonra Azərbaycanın Moskvadakı nümayəndəliyinə gələrək, özünün və ailəsinin həyatını təhlükə qarşısında qoyaraq, dünya ictimaiyyətinə müraciət etməklə və bu qırğının törədilməsində birbaşa sovet rəhbərliyini ittiham etməklə, əslində, bu faciəyə ilk siyasi qiymətini verib.

Azərbaycanın suverenliyi və müstəqilliyi uğrunda mübarizədə bu ölkədə yaşayan soydaşlarımızın rolunu qeyd edən diplomat 20 Yanvar faciəsi zamanı Gürcüstan əsilli 6 nəfərin şəhid olduğunu bildirib.

Sonra Marneuli Bələdiyyəsinin sədrinin müavini Rövşən İskəndərov, Türkiyə Maarif Okullarının Tbilisi nümayəndəliyinin rəhbəri Ali Sedat Aslan, ictimai-siyasi xadim, parlamentin sabiq deputatı Mahir Dərziyev, Əməkdar jurnalist Nizami Məmmədzadə, din xadimi Əziz Nəbiyev, Gürcüstan Azərbaycanlıları Konqresinin sədri Hüseyn Yusifov, Azərbaycan dili müəllimi Fatma Əliyeva və başqaları çıxış edərək 9 Aprel və 20 Yanvar faciələrini şərh edib, fikirlərini bölüşüblər.

Sonda ehsan süfrəsi açılıb.