Avropa Parlamenti Gürcüstanla bağlı qətnaməni təsdiqlədi
Avropa Parlamenti Gürcüstanla bağlı qətnaməni təsdiqləyib.
InterPress.ge xəbər verir ki, sənəd işğal qüvvələri tərəfindən öldürülən Tamaz Qinturi və qaçırılan Levan Dotiaşvili haqqındadır.
Qətnamə noyabrın 23-də Avropa Parlamentində səsə qoyulub. 495 deputat dəstəkləyib, 7 deputat əleyhinə olub.
Sənəddə 5 bənd var. Qətnamədə Avropa Parlamentinin deputatları Gürcüstan vətəndaşının öldürülməsini qəti şəkildə pisləyir, işin hərtərəfli araşdırılmasını, günahkarların cəzalandırılmasını və işğalçı qüvvələr tərəfindən əsir götürülən vətəndaşların azad edilməsini tələb edirlər. Onlar bir daha ölkənin ərazi bütövlüyünü və suverenliyini dəstəklədiklərini bildirirlər.
Avropa Parlamentinin deputatları Avropa Şurasına müraciət edərək “Otxozoriya-Tatunaşvili siyahısı”nın Avropa analoqunu yaratmaq və Gürcüstanın suverenliyini, ərazi bütövlüyünü və insan haqlarını pozanlara qarşı məqsədyönlü sanksiyaların tətbiq edilməsini istəyirlər.
Qətnamənin mətni ilə deputatlar Rusiyanın Gürcüstanın daxili siyasətinə müdaxiləsini pisləyir və bunun ölkənin Avropa İttifaqı ilə yaxınlaşma prosesinə təsir etməməli olduğunu vurğulayırlar.
Sənədin məzmunu beş siyasi qrup tərəfindən birgə işlənib və təsdiq üçün Avropa Parlamentinə təqdim edilib. Bu siyasi qruplar arasında:
"Avropa Xalq Partiyası";
“Sosialistlərin və Demokratların Mütərəqqi Alyansı:”;
"İslahatlar Qrupu";
"Avropa Mühafizəkarları və İslahatçılar";
"Avropa Yaşılları - Avropa Azad Alyansı" var.
Ümumi mətnin hazırlanmasından əvvəl Avropa Parlamentinin rəsmi saytına Tamaz Qinturi ilə bağlı 5 müxtəlif qətnamə yüklənib.
Avropa Parlamenti 2018-ci ildə də Gürcüstanı dəstəkləyən qətnamə qəbul edib. Sənəd avqust müharibəsinin onuncu ildönümü və Gürcüstan ərazilərinin Rusiya tərəfindən işğalı ilə əlaqədar hazırlanıb. Sənəd 20 bənddən ibarətdir. Oxtozoriya-Tatunaşvili-Başaruinin qətli və sanksiyaların tətbiqi məsələsinə ayrıca fəsil həsr olunub.
Noyabrın 22-də, səsverməyə bir gün qalmış Avropa Parlamentində bu məsələ ilə bağlı debat keçirilib. Avropa Parlamentinin deputatları sessiyada qətnamənin mətnini səsləndirib və şifahi olaraq Avropa Şurasını Oxtozoriya-Tatunaşvili siyahısının analoqunu hazırlamağa çağırıblar.
Çıxış zamanı deputatların bir hissəsi eyni kontekstdə Gürcüstan və Ukraynadan danışıb və bununla da sanksiyaların tətbiqinin vacibliyini vurğulayıblar. Sessiya zalında bir neçə dəfə Tamaz Qinturi və Levan Dotiaşvilinin adları səslənib.
