İrakli Qaribaşvili Venesiya Komissiyasının nümayəndə heyəti ilə görüşüb

Gürcüstanın Baş naziri İrakli Qaribaşvili Venesiya Komissiyasının baş katibi Simona Qranata-Mengininin rəhbərlik etdiyi Venesiya Komissiyasının Gürcüstanda rəsmi səfərdə olan nümayəndə heyəti ilə görüşüb.
 

InterPress.ge xəbər verir ki, bu barədə məlumatı Gürcüstan hökumətinin administrasiyası yayıb.

Hökumət administrasiyasında keçirilən görüşdə tərəflər Gürcüstan ilə Venesiya Komissiyası arasında dinamik inkişaf edən əməkdaşlığı müzakirə ediblər.

Baş nazir Simona Qranata-Menginə konstruktiv əməkdaşlığa və Gürcüstan qanunvericiliyinin Avropa standartlarına uyğunlaşdırılması prosesinə verdiyi töhfəyə görə təşəkkür edib və qeyd edib ki, Venesiya Komissiyası konstitusiya və normativ baza ilə bağlı məsləhətləşmələrdə və Gürcüstanın demokratik institutlarının konsolidasiyasında mühüm rol oynayır.
Gürcüstana Aİ üzvlüyünə namizəd statusunun verilməsi ilə bağlı Avropa Komissiyasının müsbət tövsiyəsinə diqqət yetirilib.
“Hökumət başçısı qeyd edib ki, Avropa Komissiyasının bu tarixi qərarı Gürcüstanın Avropa gələcəyini müəyyənləşdirir. İrakli Qaribaşvilinin qeyd etdiyi kimi, Gürcüstan Avropa İttifaqına daxil olmaq yolunda mühüm irəliləyiş əldə etməkdə davam edir və bu prosesdə Venesiya Komissiyası ilə səmərəli tərəfdaşlıq böyük əhəmiyyət kəsb edir. Baş nazir Avropaya inteqrasiya yolunda artıq aparılan islahatlar barədə nümayəndə heyətinin üzvlərinə məlumat verib.
Tərəflər səmərəli ikitərəfli əməkdaşlığı davam etdirməyə hazır olduqlarını bildiriblər”, - məlumatda qeyd olunur.

İclasda Venesiya Komissiyasının vitse-prezidenti Maykl Frendo, Komissiyanın üzvü Eirik Holmovik, Katibliyin nümayəndəsi Tanya Van Dyk, Avropa Şurasının Gürcüstan ofisinin rəhbəri Nataliya Vutova və Gürcüstan Hökumətinin Administrasiyasının rəhbəri Revaz Cavelidze iştirak edib.