Dövlət Departamenti: "Gürcüstan hakimiyyətinin USAİD ilə bağlı səsləndirdiyi iddialar yalandır"
ABŞ Dövlət Departamentinin məlumatına görə, Gürcüstan hakimiyyətinin USAİD ilə bağlı səsləndirdiyi iddialar yalandır.
InterPress.ge xəbər verir ki, bu barədə ABŞ Dövlət Departamentinin sözçünün müavini Vedant Patel bildirib.
"Tbilisidəki səfirliyimiz bununla bağlı çox aydın bəyanat verdi və yardım layihələrimizdən birinə qarşı irəli sürülən ittihamlar yalandır və Gürcüstana yardımımızın məqsədlərini mahiyyət etibarı ilə yanlış xarakterizə edir. Həmişə olduğu kimi, yardımımız şəffafdır. Biz Gürcüstan Konstitusiyası və Gürcüstanın beynəlxalq öhdəlikləri ilə təsbit olunmuş əsas hüquqların müdafiəsi üçün çalışan gürcü təşkilatlarını dəstəkləməyə davam edəcəyik”.
O, həmçinin Gürcüstanın müstəqilliyi, suverenliyi və ərazi bütövlüyünü dəstəklədiyini bildirib.
"Rusiya tərəfindən işğal olunmuş ərazilər Gürcüstanın ayrılmaz hissəsidir və biz Gürcüstanın beynəlxalq səviyyədə tanınmış sərhədləri daxilində müstəqilliyini, suverenliyini və ərazi bütövlüyünü tam dəstəkləyirik", - Patel bildirib.
O, Gürcüstan hakimiyyətini Aİ üzvlüyünə namizəd statusu almaq üçün islahatlar həyata keçirməyə çağırıb.
"Gürcü xalqının demokratik, firavan, dinc və Avro-Atlantik gələcəyə can atdığı bir vaxtda onlarla tərəfdaşlıq etməyə davam edirik. Gürcüstan hökumətini Aİ-yə namizəd statusunu qazanmaq üçün lazımi islahatları həyata keçirməyə çağırırıq və hökumətə kömək etməyə hazırıq", - deyə o söyləyib.
