Devid Kramer: "Hesab edirəm ki, prezidentin impiçmenti düzgün qərar deyil"
"Hesab edirəm ki, impiçment proseduru düzgün deyil. Fikrimcə, bu, hökumətin Gürcüstanın Aİ üzvlüyünə namizəd statusunu sarsıtmaq cəhdidir və bu, Gürcüstanın status almaq üçün lazımi islahatlar aparmaq siyasətinə uyğun gəlmir".
InterPress.ge xəbər verir ki, bunu ABŞ Dövlət Departamentinin keçmiş yüksək vəzifəli məmuru, Corc Buş İnstitutunun qlobal siyasət üzrə direktoru Devid Kramer Tbilisidə keçirilən “Putinizmi məğlub etmək” beynəlxalq konfransında iştirak edərkən deyib.
Onun sözlərinə görə, konfransın vaxtı Gürcüstanın avrointeqrasiya prosesinin maraqlı dövrünə təsadüf edir.
“Biz bura konfrans üçün Gürcüstanın Avropaya inteqrasiya prosesi baxımından maraqlı vaxt olduğu bir vaxtda gəldik. Ölkənizin prezidenti bu prosesi asanlaşdırmaq məqsədilə arqumentlər təqdim etmək üçün Avropadadır və “Gürcü arzusu”nun nəzarətində olan Gürcüstan hakimiyyəti və parlamenti ona impiçment elan etmək istəyir. Məncə bu səhvdir. Ona görə də mən hesab edirəm ki, impiçment düzgün qərar deyil. İmpiçment prosesi belə aparılmamalıdır. Düşünmürəm ki, bu, Gürcüstanın Aİ üzvlüyünə namizəd statusuna kömək edəcək”, - Kramer bildirib.
Onun sözlərinə görə, Gürcüstan Ukrayna və bir çox region ölkələri ilə birlikdə Moskvadan gələn ciddi təhlükə ilə üz-üzədir.
“Biz hamımız buradayıq, çünki bu ölkədə və ya regionda baş verənlərdən asılı olmayaraq, Gürcüstanın dostu və tərəfdarıyıq. Biz gürcü xalqı, Gürcüstanın demokratik islahatları, Gürcüstanın Avroatlantik istəyi ilə həmrəy olduğumuzu bildirmək istərdik. Açığı, Gürcüstan Ukrayna və bir çox region ölkələri ilə birlikdə Moskvanın ciddi təhlükəsi ilə üz-üzədir. Bu, region dövlətləri üzərində nəzarəti bərqərar etmək, onların müstəqilliyini, suverenliyini inkar etmək cəhdi olan Putinizm təhlükəsidir. Biz Ukraynanın, Belarusun, Ermənistanın, Azərbaycanın, Moldovanın və təbii ki, Gürcüstanın müstəqilliyinə dəstəyimizi ifadə etmək istərdik”, - Kramer bildirib.
