İrakli Ğaribaşvili: "Əgər ölkə namizəd statusu alsa, qütbləşmə dərəcəsini ən azı yarıya endirəcək"

“Mən bir neçə gün əvvəl Brüsseldə idim. Məndə belə bir təəssürat yarandı ki, bizim kifayət qədər müsbət gözləntilərimiz olmalıdır, baxmayaraq ki, ona qədər həll edilməli olan çox şey var”.

InterPress.ge xəbər verir ki, bu barədə Gürcüstanın baş naziri İrakli Ğaribaşvili bildirib.

“Mən onlara hakimiyyətimiz tərəfindən hansı addımların atıldığını ətraflı izah etdim və fəaliyyətimiz haqqında tam hesabat Avropa Komissiyasına təqdim olunub. Ona görə də hesab edirəm ki, Avropa Komissiyasının qərarını sakitcə gözləməliyik. Onlara bir daha dedim ki, bizim və bütün dünyanın düşdüyü bu vəziyyətdə, Avropa qitəsində baş verənlər və Ukraynadakı dağıdıcı müharibə beynəlxalq nizamı tamamilə dəyişdi. Belə bir vəziyyətdə onlara dedim ki, Gürcüstanın ayrılması Qərbin strateji səhvi olacaq və bu, nə Qərbin, nə də bizim maraqlarımıza uyğun deyil. Dostlarımıza da aydınlaşdırdım ki, əgər qütbləşməyə son qoymaq istəyiriksə, bizə status verməlidirlər. Bu, spekulyasiyanın əsas mövzularından biridir, qütbləşmə mənbəyidir və ölkə namizəd statusu alarsa, qütbləşmə dərəcəsini ən azı yarıya endirəcək” - deyə İrakli Ğaribaşvili bildirib.