Marina Kaliurand: "Qərb tərəfdaşları hakim partiyanın Gürcüstanı müharibəyə sürükləməyə çalışdıqları barədə bəyanatlarından təngə gəlib"
“Avropa Parlamentinin üzvləri, Avropa İttifaqının digər institutlarından olan həmkarlar və digər Qərb tərəfdaşları Gürcüstan rəsmilərinin və hakim partiya üzvlərinin Gürcüstanın müharibəyə sürüklənməsi və Gürcüstanda daha bir cəbhə açmağa çalışdıqları barədə bəyanatlarından təngə gəliblər. Bu, Kremlin təbliğat təlimatıdır və doğru deyil”.
InterPress.ge xəbər verir ki, bu barədə Avropa Parlamentinin üzvü Marina Kaliurand Brüsseldə Avropa İttifaqı-Gürcüstan Parlament Assosiasiyası Komitəsinin (PAC) 12-ci sessiyasında bildirib.
“Biz bunu Gürcüstan və gürcü xalqı üçün arzulamırıq. Dostlarınızdan heç biri sizin qanlı müharibəyə qatılmanızı istəmir. 2008-ci il müharibəsini xatırlayırıq”, - Avropa Parlamentinin deputatı bildirib.
O, parlamentin spikeri Şalva Papuaşvilinin Gürcüstanın Avropa Komissiyasının 12 tövsiyəsinin 80 faizini artıq yerinə yetirməsi barədə bəyanatına da cavab verib.
“Bir neçə gün əvvəl oxudum ki, Gürcüstan parlamentinin sədri Şalva Papuaşvili komissiyanın 12 tövsiyəsinin 80 faizinin artıq icra olunduğunu deyib və nəticədə o, Avropa İttifaqından ədalətli qiymət gözləyir. Təəssüf edirəm ki, bu bəyanatlar Gürcüstanın vətəndaş cəmiyyətindən, eləcə də komissiyadan və qərb tərəfdaşlarından əldə etdiyimiz məlumatlara əsaslanaraq suallar doğurur. İllər əvvəl Gürcüstan Şərq tərəfdaşları arasında lider idi, fakt odur ki, 12 prioritet üzrə irəliləyiş hələ də natamam və çox vaxt səthi xarakter daşıyır. Bu, həm də ona təsir edir ki, bu gün Gürcüstan bəzi əsas sahələrdə Ukrayna və Moldovadan geri qalır”, - avropalı parlamentari bildirib.
