Parlament MSK-nın yaradılması qaydalarına dəyişikliklərə baxmağa başlayır
Parlament MSK-nın yaradılması qaydalarına dəyişikliklərə baxmağa başlayır.
InterPress.ge xəbər verir ki, mayın 15-də keçiriləcək iclasda “Gürcü Arzusu” deputatlarının təşəbbüsü ilə Prosessual Məsələlər və Qaydalar Komitəsi və Hüquq Məsələləri Komitəsi “Seçki Məcəlləsi”nə və Milli Məclisin Reqlamentinə dəyişikliklər layihəsini müzakirə edəcək.
Nəzərdə tutulan dəyişikliklərlə MSK-nın sədrliyinə və peşəkar üzvlüyünə namizədləri seçib parlamentə təqdim etmək səlahiyyəti prezidentin əvəzinə parlament sədrinə veriləcək. Onların seçilməsi ilə bağlı prosedur və kvorum da dəyişir - parlament MSK sədrini və üzvlərini səs çoxluğu ilə (76 səs) dəstəkləsə, onlar 5 il müddətinə bu vəzifəni tutacaqlar.
Qanun layihələrinə görə, parlament sədri MSK sədrinin və üzvlərinin seçilməsi üçün müsabiqə elan edəcək və müsabiqə komissiyasını yaradacaq. Parlamentin sədri MSK sədrinin və MSK üzvlərinin namizədliyini parlamentə təqdim edəcək. MSK-nın sədri və üzvləri parlament tərəfindən tam tərkibin səs çoxluğu ilə seçiləcək.
Çoxluğun qanunvericilik təşəbbüsü Müsabiqə Komissiyasında Prezidentin bir nümayəndəsinin olmasını nəzərdə tutur. Eyni layihəyə görə, səsvermə nəticəsində vakant yerlərin hamısı tutulmazsa, prezident müvafiq müsabiqədə iştirak edən digər namizədi irəli sürür və prezidentin irəli sürdüyü namizədə səs verilir.
Qanun layihəsinin müəllifləri parlament üzvləridir: Mamuka Mdinaradze, Qivi Mikanadze, Davit Matikaşvili, Rati İonatamişvili və İrakli Şatakişvili.
Məlumat üçün bildirək ki, mövcud qanunvericilik nəzərə alınmaqla, MSK-nın sədrliyinə və üzvlüyünə namizədlər seçki üçün Milli Məclisə prezident tərəfindən təqdim edilməlidir, ona qədər müsabiqə komissiyasını yaradır və müsabiqə elan edir. Onların parlament tərəfindən seçilmə qaydasına və proseduruna gəlincə, MSK sədrinin və üzvlərinin seçilməsi üçün plenar iclasda səsvermə ilkin olaraq 2/3 kvorumla keçirilir.
MSK-nın kadr təminatının hazırkı modeli Şarl Mişel Sazişinin bir hissəsidir.
