Onkoloji diaqnozu olan 300 uşağın müalicəsini dövlət tam şəkildə öz üzərinə götürəcək
Hökumətin qərarına əsasən, onkoloji diaqnozu olan 300 uşağın müalicəsini dövlət tam şəkildə öz üzərinə götürəcək.
InterPress.ge xəbər verir ki, bunu Gürcüstanın baş naziri İrakli Ğaribaşvili hökumətin iclasında deyib.
O deyib ki, bu məqsədlə təxminən 30 milyon lari ayrılacaq.
“Gürcüstanda onkoloji diaqnozu qoyulan 300-ə yaxın uşaq var ki, bu da təbii ki, dövlətimiz tərəfindən maliyyələşdirilir, hər il təxminən 10 milyon lari ayrılır. Bildiyiniz kimi, təəssüf ki, Gürcüstanda bu gün xəstələrə tam və keyfiyyətli, yaxşı standartda xidmət göstərmək üçün heç də bütün şərait yaradılmayıb. Bir çox hallarda bu uşaqları xaricdə müalicə etməliyik. Bunlara proton terapiyası, radiasiya və s. daxildir. Bəzi hallarda bir kurs 100.000 avroya başa gəlir. Təbii ki, vətəndaşlarımızın buna imkanı çatmır. Qərarımıza əsasən, onkoloji diaqnozu olan 300 uşaq dövlət tərəfindən maliyyələşdiriləcək. Biz bu uşaqların müalicə olunacağı dünyanın ən yaxşı klinikalarından bəzilərini seçmişik. Bunun üçün 30 milyon lariyə qədər ayrılacaq və biz müalicə, yaşayış və ya səyahət olsun, bütün xərcləri tam ödəyəcəyik. Onkoloji diaqnozu qoyulan bütün uşaqların müalicəsi dövlət tərəfindən maliyyələşdiriləcək. Bu, çox vacib bir qərardır, insanların həyatını xilas etməkdir və bütün belə insanlara kömək etmək bizim borcumuzdur”, – Ğaribaşvili bildirib.
