"Saakaşvilinin gəlməsində məqsəd müharibəyə zəmin hazırlamaq idi" - Ğaribaşvili

Baş nazir İrakli Ğaribaşvilinin sözlərinə görə, Gürcüstanın üçüncü prezidenti Mixeil Saakaşvilinin gəlişində məqsəd ölkədə “ikinci inqilabı həyata keçirmək” və müharibənin başlanması üçün zəmin hazırlamaq olub.

InterPress.ge xəbər verir ki, Baş nazir bu barədə parlamentdə çıxışı zamanı qeyd edib.

O bildirib ki, bunu həm Saakaşvilinin gəldiyi dövr, həm də Ukrayna hakimiyyətinin bəyanatları təsdiqləyir.

"2021-ci il oktyabrın 1-də qeyri-qanuni şəkildə, gizlicə gələn keçmiş prezident Saakaşvili tutuldu, onun yeganə məqsədi Gürcüstanda ikinci inqilab təşkil etmək idi. Onun mimetik hesablamalarına görə, inqilab olmalı, qan tökülməli, hakimiyyət zorakılıqla devrilməli, seçkilər çökməli idi. Bu dövr danışıqların başladığı dövrə tam təsadüf edir, bizim tərəfdaşlarımızda Ukraynada müharibənin noyabr və ya dekabrda başlayacağına dair məlumatlar var idi. Bu, Rusiya ilə Qərb arasında davam edən ünsiyyət səbəbindən bir neçə ay təxirə salındı. Mən bu dövrü təsadüfən qeyd etməmişəm, bu dövr birbaşa Saakaşvilinin Gürcüstana daxil olması və hakimiyyəti devirmək, çevriliş və inqilab etmək niyyəti ilə üst-üstə düşür. Bunu Ukrayna hakimiyyətinin bəyan etdiyi məqsədlə, onların hərəkətləri ilə əlaqələndirsək ki, onların vəzifəsi Gürcüstanda ikinci cəbhə açmaq idi, məncə, heç bir ağıllı adamın heç bir şübhəsi qalmaz ki, Saakaşvilinin gəlməsinin məqsədi Gürcüstanda müharibə başlamasına zəmin yaratmaq idi. Əlbətdə ki, onlar bunu bacara bilmədilər. Ölkəmizin daxili və xarici düşmənləri məğlub oldu”, - Ğaribaşvili deyib.

Xatırlatmaq istərdik ki, bu gün İrakli Ğaribaşvili parlamentdə dindirilir.