ABŞ səfiri: "İndi biz hamımız istəyirik ki, hər bir deputat qırmızı düyməni bassın və bu qanun layihələrinə yox desin"

"Gürcü xalqı, xüsusən tələbələr və gənclər yüksək səslə və aydın danışdılar və hakim partiya nəhayət onları dinlədi. İndi biz hamımız istəyirik ki, hər bir deputat qırmızı düyməni bassın və bu qanun layihələrinə yox desin, Kremldən ilhamlanan və Gürcüstanda lazımsız olan bu qanun layihələrinə rəsmən yox desin!".

InterPress.ge xəbər verir ki, bu barədə ABŞ-ın Gürcüstandakı səfiri Kelli Deqnan açıqlama verib.

Onun sözlərinə görə, Gürcüstanın bu qanun layihələrinə ehtiyacı yoxdur və Gürcüstana gələn xarici yardımın ölkənin maraqları naminə istifadə olunmasını təmin etmək və öz icmasının həyatını yaxşılaşdırmaq üçün var gücü ilə çalışan gürcülərə kömək etmək üçün kifayət qədər şəffaflığı var.

“Xarici yardım 30 ildir ki, buna xidmət edir”, - səfir qeyd edib.

Onun sözlərinə görə, indi Gürcüstanda bütün enerji və diqqət Aİ-yə namizəd statusunun əldə olunmasına yönəlməlidir.

“Gürcüstan xalqının indi görmək istədiyi odur ki, onların hökuməti Gürcüstanın Aİ-yə namizəd statusunu almaq vədini yerinə yetirir və ümid edirəm ki, bütün enerji və diqqət buna yönələcək. Bu, hər bir gürcünün həyatını yaxşılaşdırmaq üçün böyük fürsətdir və gürcü xalqı öz hökumətini namizəd statusu əldə etmək vədinə görə cavabdeh etməlidir”, - səfir qeyd edib.