Komitə “Xarici təsirin şəffaflığı” və “Xarici agentlərin qeydiyyatı” ilə bağlı layihələri dəstəklədi
Parlamentin Xarici Əlaqələr və Müdafiə və Təhlükəsizlik üzrə Birgə Komitəsi “Xarici təsirin şəffaflığı” və “Xarici agentlərin qeydiyyatı” ilə bağlı layihələri dəstəkləyib.
InterPress.ge xəbər verir ki, bundan əvvəl Agentlər haqqında qanun layihələrinin müzakirəsi etirazlar fonunda baş tutub. Parlamentin dəhlizində də səs-küy, mübahisə yaranıb.
Qanunvericilik orqanında etiraz aksiyası keçirən media, qeyri-hökumət təşkilatları və müxalifət nümayəndələri qanun layihələrinin əslində Rusiya qanunlarına bənzədiyini və bunun Gürcüstanın Avropaya inteqrasiya yolunda irəliləyişinə xeyli maneə törətdiyini bildiriblər.
Qanun layihələrini "Xalqın Gücü" çoxluğunun üzvləri təqdim ediblər: - Sozar Subari, Dimitri Xundadze, Mixeil Ğavelaşvili, Quram Maçaraşvili, Daçi Beraya, Viktor Caparidze, Eka Sefaşvili, Davit Kaçarava və Zaal Mikeladze.
İlkin olaraq “Xarici təsirin şəffaflığı haqqında” qanun layihəsi parlamentdə qeydə alınıb. Sözügedən qanun layihəsində “şəffaflığın təmin edilməsi” məqsədilə sahibkarlıq fəaliyyəti ilə məşğul olmayan (qeyri-kommersiya) hüquqi şəxslərin və gəlirləri (20%-dən çoxu) xaricdən əldə olunan kütləvi informasiya vasitələrinin xarici təsir agenti kimi qeydiyyata alınması nəzərdə tutulur.
Qanun layihəsinə əsasən, “xarici təsir agenti” hesab edilən hər bir şəxs eyni adlı məlumat bazasında dövlət reyestrində qeydiyyatdan keçməlidir. Qeydiyyat zamanı alınan gəliri əks etdirmək lazım gələcək. Eyni zamanda, təşkilatların hər il maliyyə bəyannaməsini doldurmaq öhdəliyi olacaq.
“Xarici təsir agentlərinin müəyyən edilməsi haqqında” qanun layihəsi Ədliyyə Nazirliyinə istənilən vaxt məsələnin araşdırılması və öyrənilməsi-nəzarətini həyata keçirmək səlahiyyəti verir.
Həmin layihəyə əsasən, monitorinqin başlanması üçün Ədliyyə Nazirliyinin müvafiq səlahiyyətli şəxsinin qərarı və Ədliyyə Nazirliyinə təqdim edilmiş “xarici dövlətin konkret agenti ilə bağlı müvafiq arayışı özündə əks etdirən yazılı açıqlama əsas olacaq”.
Xarici təsir agenti kimi qeydiyyatdan yayınmaq və ya bəyannaməni doldurmamaq təşkilatın 25 min lari məbləğində cərimələnməsi ilə nəticələnəcək. Layihədə həmçinin aşağıdakı cərimə növləri də nəzərdə tutulur: - Ədliyyə Nazirliyinin internet saytında qeyd olunandan sonra 10 iş günü ərzində təşkilat ərizə formasını doldurmadıqda 10 min lari; Göstərilən müddətdə sənədlərdə çatışmazlıqlar aradan qaldırılmadıqda - 10 min lari; Bir aydan sonra qanun pozuntusuna yol vermək - 20 min lari."
İkinci - “Xarici agentlərin qeydiyyatı haqqında” qanun layihəsinə gəlincə, qeyd olunan qanun layihəsi nəzərə alınmaqla, xaricdən maliyyə alan istənilən fiziki və hüquqi şəxsin xarici agent kimi qeydiyyatdan keçmə öhdəliyi olacaq.
“Xarici agentlərin qeydiyyatı haqqında” Qanunda nəzərdə tutulmuş öhdəliyin yerinə yetirilməməsi və ya lazımınca yerinə yetirilməməsi cinayət məsuliyyətinə səbəb olur və cərimə və ya 5 ilədək müddətə azadlıqdan məhrum etmə ilə cəzalandırılır.
Layihəyə əsasən, qanun layihəsi ilə müəyyən edilmiş xarici dövlətin agenti olmaq meyarlarına cavab verən qurumlar Baş Prokurorluğa müraciət etməli və xarici dövlətin agenti kimi qeydiyyata alınmasını tələb etməlidir.
Göstərilən qanunun qüvvəsi diplomatlara, konsullara və diplomatik xidmətin və konsulluq müəssisəsinin işçilərinə şamil edilmir. Qanun həmçinin xarici ölkənin vəzifəli şəxslərinə, xeyriyyəçilik fəaliyyəti ilə məşğul olan şəxsə və “dini, təhsil, elm, akademik və ya incəsənət fəaliyyəti ilə vicdanla məşğul olan” şəxsə şamil edilmir.
