Baş nazir Davos Dünya İqtisadi Forumunun təsisçisi və icraçı sədri Klaus Şvab ilə görüşüb

Gürcüstanın Baş naziri İrakli Qaribaşvili Davos Dünya İqtisadi Forumunun təsisçisi və icraçı sədri, professor Klaus Şvab ilə görüşüb.

InterPress.ge xəbər verir ki, Dubayda keçirilən görüşdə Gürcüstanla Dünya İqtisadi Forumunun komandası arasında məhsuldar əməkdaşlıq vurğulanıb.

Baş nazir Klaus Şvabın Dünya İqtisadi Forumunun təşkilində xüsusi şəxsi töhfəsini vurğulayıb və 2023-cü il Dünya İqtisadi Forumunun yüksək səviyyədə təşkil olunduğunu və forumda iştirak edən dünya liderlərinə konkret nəticələr verdiyini qeyd edib.

İrakli Qaribaşvili Klaus Şvaba Gürcüstandakı əlverişli investisiya mühiti barədə məlumat verib və qeyd edib ki, regionda və dünyada mövcud olan çağırışlara baxmayaraq, düzgün siyasət nəticəsində Gürcüstan hökuməti ikirəqəmli iqtisadi artımı və ölkədə sabit mühiti təmin edib.

Həmçinin Gürcüstanın strateji tranzit sahəsi vurğulanıb. İrakli Qaribaşvili və Klaus Şvab regional əhəmiyyətli strateji layihələrdən danışıblar.