Dünya Azərbaycanlılarının Həmrəylik Günü və Yeni il münasibətilə “Bir olaq, həmrəy olaq!” adlı bayram tədbiri təşkil olunub

Diasporla İş üzrə Dövlət Komitəsi 31 dekabr – Dünya Azərbaycanlılarının Həmrəylik Günü və Yeni il münasibətilə “Bir olaq, həmrəy olaq!” adlı bayram videokonfransı təşkil edib.

InterPress.ge xəbər verir ki, konfransda 63 ölkədən 500-ə yaxın soydaşımız işdirak edib.

Komitə sədri Fuad Muradov videokonfransı açıq elan etdikdən sonra Azərbaycan torpaqlarının azadlığı və bütövlüyü uğrunda canından keçən şəhidlərin əziz xatirəsi ehtiramla yad edilib.
Daha sonra Azərbaycanın Dövlət Himni səsləndirilib.

Komitə sədri xaricdə yaşayan Azərbaycanlıları bayram münasibətilə təbrik edib, Prezident İlham Əliyevin Dünya Azərbaycanlılarının Şuşada keçirilmiş V (Zəfər) Qurultayındakı tövsiyələri əsasında diaspor quruculuğu sahəsində başlanan yeni və mühüm mərhələdən danışıb. Azərbaycanın xaricdəki icmalarının qarşısında dayanan hədəf və vəzifələrə diqqət cəlb edilib, qalib Azərbaycanın adının yüksək səviyyədə təmsil olunması naminə fədakar xidmətlər göstərən diasporumuza minnətdarlıq ifadə olunub. 
 

Azərbaycan diasporunun 2022-ci ildəki fəaliyyətini əks etdirən videohesabat təqdim olunub.

Soydaşlarımız Prezident İlham Əliyevi doğum günü münasibətilə təbrik edib, dünya azərbaycanlılarına daim həssas münasibət və qayğı göstərən dövlət başçısına minnətdarlıqlarını bildirib, hər zaman Azərbaycanın və onun ali siyasi rəhbərliyinin yanında olduqlarını bəyan ediblər.

Görüşdə diasporumuzun koordinasiyalı fəaliyyət imkanlarının genişləndiyi barədə danışılıb, yeni ildəki hədəflər dilə gətirilib. Konfrans iştirakçıları qeyd ediblər ki, bu qədər soydaşımızın iştirakı ilə görüşlərin təşkil olunmasının ənənəyə çevrilməsi  onların əlaqələrinin inkişafı baxımından xüsusi əhəmiyyət daşıyır və daha sıx birləşmələrinə ciddi təkan verir. 

Azərbaycan dilinin və mədəniyyətinin xarici ölkələrdə təbliğinə, Azərbaycan diasporunun fəaliyyətinə verilən mühüm töhfələrə, ölkənin  beynəlxalq aləmdə ikitərəfli və çoxtərəfli əlaqələrinin inkişafındakı səmərəli işinə görə bir qrup diaspor üzvü “Diaspor fəaliyyətində xidmətə görə” medalı ilə təltif olunub.

Soydaşlarımızın hazırladıqları müxtəlif musiqi nömrələrinin, “Həmrəylik” videoçarxının təqdim olunduğu konfrans “Diaspor Marşı”nın sədaları altında yekunlaşıb.