Bolnisi Bələdiyyəsinin 2023-cü il büdcəsi 38,140,000 lari müəyyən edilib
Bolnisi Bələdiyyə Şurasının iclasında deputatlar digər məsələlərlə yanaşı, Bolnisi Bələdiyyəsinin 2023-cü il büdcəsini də müzakirə edərək təsdiq ediblər.
InterPress.ge xəbər verir ki, bu barədə Bolnisi bələdiyyəsinin meriyası məlumat verib.
Məlumata görə, bələdiyyənin növbəti il üçün əsas maliyyə sənədi 38 milyon 140 min lari müəyyən edilib. 2023-cü ildə sosial maliyyələşdirmə 4 milyon 803 min 140 lari, infrastrukturun inkişafına isə 6 milyon 456 min lari ayrılıb.
Bolnisi Bələdiyyəsinin meriyasında qeyd olunub ki, infrastruktur, sosial təminat, səhiyyə və təhsil gələn ilin büdcəsinin prioritet istiqamətləri olaraq qalır.
“Bolnisi Bələdiyyə Şurası 2023-cü il büdcəsini təsdiqlədi. Gələn il bələdiyyəmizin inkişafı üçün 38 milyon 140 min lari istifadə olunacaq. 2023-cü ilin büdcəsində mümkün qədər vətəndaşların maraq və ehtiyacları əks olunub. Sosial proqramlar Bolnisi Bələdiyyəsi üçün prioritetdir, ona görə də gələn ilin büdcəsində bu istiqamətdə 4 803 140 lari nəzərdə tutulub. 2023-cü ildə biz bələdiyyədə bir sıra infrastruktur layihələrini həyata keçirməyi planlaşdırırıq ki, bunun üçün 6 milyon 456 min lari ayrılıb. Ümid edirəm ki, 2023-cü il Bolnisə çoxlu uğurlar gətirəcək. Biz vətəndaşların və bələdiyyənin rifahı üçün səylərimizi əsirgəməyəcəyik”, - deyə Bolnisi bələdiyyəsinin meri Davit Şerazadişvili bildirib.