Gürcüstan və Ermənistan parlamentlərinin xarici əlaqələr komitələri arasında əməkdaşlıq memorandumu imzalanıb

Gürcüstan Parlamentinin Xarici Əlaqələr Komitəsinin sədri Nikoloz Samxaradze Ermənistan Respublikası Milli Assambleyasının Xarici Əlaqələr Komitəsinin sədri Eduard Ağacanyanla görüşüb. Parlamentin məlumatına görə, tərəflər ölkələr arasında müxtəlif istiqamətlərdə əlaqələrin gücləndirilməsindən danışıblar. İki ölkənin qanunvericilik orqanlarının xarici əlaqələr komitələri arasında əməkdaşlığın dərinləşdirilməsinə diqqət yetirilib və bu əməkdaşlıq memorandumunun imzalanması ilə təsdiqlənib.
Regional təhlükəsizlik məsələləri də söhbət mövzusu olub. 

InterPress.ge xəbər verir ki, iclasdan sonra xarici əlaqələr komitələrinin sədrləri birgə bəyanatla çıxış ediblər.

"Gürcüstan parlamentində Gürcüstan və Ermənistan parlamentlərinin xarici əlaqələr komitələri arasında əməkdaşlıq memorandumu imzalanıb ki, bu da iki komitə arasında parlament əməkdaşlığını yeni səviyyəyə qaldıracaq və ona institusional görünüş verəcək. Bu, çox mühüm qərardır ki, biz bu il diplomatik münasibətlərin 30 illiyini qeyd edirik, lakin Gürcüstanla Ermənistan arasında dostluq münasibətləri 30 il deyil, bir neçə onilliklərdir", - Nikoloz Samxaradze bildirib.

Onun sözlərinə görə, memorandum çərçivəsində iki ölkənin xarici əlaqələr komitələri birgə görüşlər keçirəcək, müxtəlif istiqamətlər üzrə təcrübə mübadiləsi aparacaqlar. Tərəflər ümidvar olduqlarını bildirirlər ki, bu cür görüşlər hər iki ölkəyə daha çox fayda gətirəcək, qanunverici orqanlar və ölkələr arasında əlaqələri dərinləşdirəcək.

"Gürcüstanla müxtəlif sahələrdə səmərəli əməkdaşlıq strateji əhəmiyyət kəsb edir və bu, Ermənistan hökumətinin 2021-2022-ci illər üçün fəaliyyət planında qeyd olunub. Əminəm ki, bizim əlaqələrimiz və imzalanmış memorandum münasibətlərin dərinləşməsi üçün stimul olacaq. Görüş zamanı regionun təhlükəsizlik məsələlərini müzakirə etdik. Ermənistan regionun təhlükəsizliyində maraqlıdır. Bu kontekstdə Gürcüstanla Ermənistan arasında münasibətlərin yeni mərhələsinə keçid bu təhlükəsizliyin təminatıdır. Gürcü həmkarlarımız Gürcüstanın Ermənistan-Azərbaycan münasibətlərində vasitəçi rolunu oynamağa hazır olduqlarını və səmimi iradələrini bildirdilər", - Eduard Ağacanyan bildirib.

Bu gün keçirilən iclasda iki ölkənin qanunvericilik orqanlarının xarici əlaqələr komitələrinin sədrləri ilə yanaşı, komitələrin üzvləri də iştirak ediblər.