Gürcüstan-Ermənistan sərhədində yeni avtomobil gömrük-keçid məntəqəsi açıldı
Gürcüstan-Ermənistan sərhədində “Ninotsminda” avtomobil gömrük-keçid məntəqəsi istifadəyə verilib.
InterPress.ge xəbər verir ki, bu barədə Maliyyə Nazirliyinin Gəlirlər Xidmətindən məlumat verilib.
Gürcüstanın maliyyə naziri Laşa Xuçişvili, Gəlirlər Xidmətinin rəhbəri Levan Kakava, Ermənistan Respublikasının Gəlirlər Komitəsinin sədri Rüstəm Badasyan və Gömrük İdarəsinin rəisi Zurab Sicinava rəsmi açılış mərasiminə dəvət olunmuş qonaqlar, gömrük əməkdaşları və patrul polisinin əməkdaşları qarşısında çıxış ediblər.
“Gömrük buraxılış məntəqəsinin açılışında Ermənistan Respublikasının maliyyə nazirinin müavini Arman Poqosyan, Gürcüstan Daxili İşlər Nazirliyinin, Gəlirlər Xidmətinin, İstintaq Xidmətinin rəhbərləri, tərəfdaş qurumların, diplomatik korpusun və yerli hökumətin nümayəndələri iştirak ediblər.
Gürcüstanın maliyyə naziri Laşa Xuçişvili çıxışında yeni gömrük infrastrukturunun həm ikitərəfli, həm də regional əməkdaşlıq istiqamətində əhəmiyyətini vurğulayıb.
Onun qeyd etdiyinə görə, Gürcüstan mühüm tranzit ölkə statusuna malikdir. Buna uyğun olaraq hökumətin səyləri regionda beynəlxalq standartlara uyğun, qarşılıqlı faydalı, tərəfdaşlıq əməkdaşlığına əsaslanan iqtisadi siyasətin həyata keçirilməsinə yönəlib.
“Ninotsminda” gömrük keçid məntəqəsində beynəlxalq yükdaşımaları həyata keçirən yük, sərnişin, yüngül avtomobillər üçün müasir idarəetmə sistemləri ilə təchiz olunmuş 11 çıxış təşkil edilib. Keçid məntəqəsində 70-ə yaxın gömrük əməkdaşı çalışacaq. Hər gün hər iki istiqamət ən azı 600 yük maşını, 3000 minik avtomobili və 8000 sərnişin daşımaq üçün nəzərdə tutulub.
Bundan əlavə, infrastruktur işləri çərçivəsində təxminən 4000 kv.m. ərazi, həmçinin yeni yeraltı kommunikasiyalar, drenaj şəbəkəsi, avtomobillərə baxış anqarası təşkil olunub. Layihədə ərazinin yaşıllaşdırılması da nəzərdə tutulub”, - məlumatda bildirilir.
