Nikoloz Samxaradze: "Belə bir addım təkrarlanarsa, Belarusla münasibətlərimizi poza bilərik"

Parlamentin Xarici Əlaqələr Komitəsinin sədri Nikoloz Samxaradze Aleksandr Lukaşenkonun işğal olunmuş Abxaziyaya "səfərinə" münasibət bildirib və deyib ki, gələcəkdə də oxşar addım təkrarlanarsa, bu, iki ölkə arasında münasibətlərin kəsilməsinə gətirib çıxara bilər.

InterPress.ge xəbər verir ki, o, bu barədə Xarici Əlaqələr Komitəsinin iclasında açıqlama verib.

“Belarus prezidenti Aleksandr Lukaşenkonun Suxumiyə səfəri birbaşa qeyri-dost jestdir və Gürcüstanın ərazi bütövlüyü və suverenliyinin kobud şəkildə pozulmasıdır. Hamımız razıyıq ki, belə addımlar həm ölkənin suverenliyinə, həm beynəlxalq hüququn fundamental prinsiplərinə, həm də Gürcüstan və Belarus arasında diplomatik münasibətlərə xələl gətirir.

Belarus tərəfi bilməlidir ki, belə bir addım gələcəkdə təkrarlanarsa, bu, hətta iki ölkə arasında münasibətlərin kəsilməsinə gətirib çıxara bilər. Biz heç kimin ölkəmizin ərazi bütövlüyünə və suverenliyinə xələl gətirməsinə imkan verməyəcəyik”, - deyə Samxaradze bildirib.

Belarus prezidenti Aleksandr Lukaşenko işğal altındakı Abxaziyaya gəlib. O, Bicvintada bağ evində Abxaziyanın de-fakto prezidenti Aslan Bjaniya ilə görüşüb.

Gürcüstan Xarici İşlər Nazirliyi Aleksandr Lukaşenkonun Gürcüstanın dövlət sərhədini pozaraq işğal olunmuş Abxaziyaya “səfərini”  pisləyib və Belarusu suveren dövlətin ərazi bütövlüyünə hörmət etməyə və beynəlxalq hüququn əsas prinsiplərə zidd hərəkətlər etməməyə çağırıb.

Belarus səfiri Anatoli Lis etiraz əlaməti olaraq Gürcüstan Xarici İşlər Nazirliyinə çağırılıb.

Rəsmi qurumlar Belarus prezidentinə qarşı Gürcüstan qanunvericiliyinin pozulması faktı ilə bağlı cinayət işinin başlandığını açıqlamayıblar.