Rati Breqadze Türkiyənin ədliyyə nazirini qəbul etdi

Gürcüstanın ədliyyə naziri Rati Breqadze Türkiyənin ədliyyə naziri Abdulhamit Gülü qəbul edib.

InterPress.ge xəbər verir ki, bu barədə Ədliyyə Nazirliyindən məlumat verilib.

Məlumata görə, Rati Breqadze Türkiyənin ədliyyə nazirinə Nazirliyin fəaliyyətinin üç əsas istiqaməti, yəni insan hüquqlarının yüksək səviyyədə qorunması, ölkənin hüquqi təhlükəsizliyinin təmin edilməsi və dövlət xidmətlərinin daha da inkişaf etdirilməsi barədə məlumat verib.

Gürcüstanın ədliyyə naziri türkiyəli həmkarını Ədliyyə Nazirliyində qəbul edib. Abdulhamit Gül Gürcüstana ilk rəsmi səfərini edib.

"Tərəflər iki ölkə arasında mövcud əməkdaşlığı müzakirə etdilər. Görüşdə Gürcüstan və Türkiyə Ədliyyə Nazirlikləri arasındakı sıx əlaqələrin bir çox sahədə uğurlu ortaqlığın əsası olduğu qeyd edildi. Türkiyənin ədliyyə naziri Abdulhamit Gül nazirliyin 10 illik inkişaf planı ilə də maraqlandı və nazirliyin strateji istiqamətləri ilə tanış oldu.

Görüşdən sonra tərəflər əməkdaşlıq memorandumu imzaladılar. Sənəd 2021-2024-cü illər üçün nazirliklər arasında ortaq əməkdaşlıq proqramını müəyyən edir. Daha sonra Rati Breqadze və Abdulhamit Gül Tbilisi Ədliyyə Evinə getdilər. Türkiyənin ədliyyə naziri Ədliyyə Evinin fəaliyyəti ilə tanış oldu və xidmətlər haqqında ətraflı məlumat aldı", -  məlumatda qeyd olunub.