Fələstinin “Həmas” hərəkatı Qəzza zolağında müharibənin sona çatdığını rəsmən bəyan edib.
InterPress.ge xəbər verir ki, bu barədə təşkilatın danışıqlar üzrə nümayəndə heyətinin rəhbəri Xalil əl-Hayya məlumat verib. Onun açıqlaması Reuters və Al Jazeera tərəfindən yayılıb.
“Qardaş vasitəçilərdən və ABŞ administrasiyasından zəmanət aldıq. Onlar təsdiq etdilər ki, müharibə tamamilə başa çatıb,” – deyə əl-Hayya bildirib.
Əl-Hayyanın sözlərinə görə, əldə olunan razılaşmaya əsasən, İsrail həbsxanalarında ömürlük məhkum olunan 250 fələstinli azad ediləcək. Bundan əlavə, müharibə başlayandan sonra həbs edilən 1 700 Qəzza sakini də azadlığa buraxılacaq.
Razılaşma həmçinin Rəfah sərhəd-keçid məntəqəsinin hər iki istiqamətdə açılmasını da nəzərdə tutur.
Xatırladaq ki, bundan öncə ABŞ prezidenti Donald Tramp bəyan etmişdi ki, “Həmas” bütün girovları oktyabrın 13-14-də (bazar ertəsi və çərşənbə axşamı) azad edəcək.
