იმ შემთხვევაში, თუ ხელისუფლება შეარბილებს, ან მოხსნის, შეზღუდვებს, ჩემი რეკომენდაცია შემდეგი იქნება - შევეცადოთ, ჩვენს თავს ჩვენ თვითონ დავუწესოთ რეგულაციები, - ამის შესახებ ინფექციური პათოლოგიისა და შიდსის ცენტრის გენერალურმა დირექტორმა, თენგიზ ცერცვაძემ განაცხადა.
მისი თქმით, როგორმე, ამ ერთ ახალ წელს უნდა ავიტანოთ დისკომფორტი იმისთვის, რომ მთელი შემდეგი წელი უფრო მშვიდად გავატაროთ.
"არ ვიცი, ხელისუფლება ამ შეზღუდვებს შეარბილებს, საერთოდ მოხსნის, ამ მოცულობით დატოვებს ძალაში, თუ კიდევ უფრო გაამკაცრებს, როგორც ეს ქალბატონმა მერკელმა გააკეთა, მაგრამ იმ შემთხვევაში, თუ შეარბილებს, ან მოხსნის, ჩემი რეკომენდაცია შემდეგი იქნება – გამოვიჩინოთ ის საზოგადოებრივი თვითშეგნება, პასუხისმგებლობა და სოლიდარობა, რომელიც პანდემიის დაწყების დროს საკმარისად გვქონდა და იმ შეზღუდვებს, რომელსაც მთავრობა მოხსნის, ჩვენ ჩვენი თვითშეზღუდვებითა და ჩვენი ცენზურებით ვუპასუხოთ. შევეცადოთ, ჩვენს თავს ჩვენ თვითონ დავუწესოთ ის რეგულაციები, რომელიც არ გამოიწვევს იმას, რომ მთავრობის მიერ შერბილებული რეგულაციების გამო დროებით შეჩერებული პანდემია ხელმეორედ აფეთქდეს.
სხვანაირად რომ ვთქვათ, თუ მთავრობა მოლებსა და მაღაზიებს გახსნის, ვისაც ამის აუცილებელი საჭიროება არ გვაქვს, ნუ გავიქცევით ამ მოლებში და მაღაზიებში; ნუ მოვაწყობთ ხალხმრავალ შეკრებებს; როგორმე, ამ ერთ ახალ წელს ავიტანოთ დისკომფორტი იმისთვის, რომ მთელი შემდეგი წელი უფრო მშვიდად გავატაროთ,"- განაცხადა თენგიზ ცერცვაძემ საზოგადოებრივი მაუწყებლის ეთერში.
(report)
