საქართველოს პარლამენტთან სამოქალაქო აქტივისტების აქცია - პერფორმანსი გრძელდება. ცოტა ხნის წინ, პარლამენტის შენობასთან ერთ-ერთი სამოქალაქო აქტივისტი ზებრას ფორმაში გადაცმული მივიდა, რომელსაც ეკეთა ე.წ. ბეიჯი წარწერით „დეპუტატის მოწმობა 41, საქართველოს პარლამენტის წევრი" . მისი განმარტებით, ამ ფორმით ის პარლამენტში დღეს მიმდინარე მოვლენების, ახალი მოწვევის პარლამენტის სხდომისადმი თავის დამოკიდებულებას გამოხატავს.
„პარლამენტის დეპუტატი ვარ, თუ შეიძლება გამატარეთ, სხდომაზე მაგვიანდება. უკვე დაწყებულია რეგისტრაცია. პარლამენტის ჩვეულებრივი დეპუტატი ვარ. მიკეთია ცესკო-ს მიერ გაცემული „ბეიჯი". 90 ზებრა იქ უკვე არის და მელოდებიან“, - განაცხადა აქტივისტმა.
მანამდე კი საქართველოს პარლამენტში მივიდნენ ცესკო-ს თავმჯდომარე თამარ ჟვანია და ახალი მოწვევის დეპუტატები. მათ პარლამენტის შენობაში შესვლა სამოქალქო აქტივისტების შეძახილებისა და „სირცხვილის კორიდორის" გავლის ფონზე მოუწიათ.
როგორც აქციის მონაწილეები აცხადებენ, ისინი დარჩებიან პარლამენტის შენობასთან მე-10 მოწვევის პარლამენტის პირველი სხდომის პარალელურად.
შენობის შესასვლელებთან მობილიზებულია საპატრულო პოლიცია.
