საქართველო რჩება რეგიონში ამერიკის პოლიტიკის მთავარ დასაყრდენად, – ამის შესახებ საქართველოს პრეზიდენტმა, სალომე ზურაბიშვილმა აშშ-ის სახელმწიფო მდივან, მაიკ პომპეოსთან შეხვედრის შემდეგ განაცხადა.
„ეს შეხვედრა კიდევ ერთხელ ადასტურებს, რამდენად ახლოს ვართ ერთმანეთთან აშშ და საქართველო, რამდენად მყარია აშშ-ის მხარდაჭერა საქართველოსა და ამ რეგიონის მიმართ, მით უმეტეს დღეს, როდესაც რეგიონში ცვლილებები მიმდინარეობს. ის, რომ მაიკ პომპეოს ტურნე საფრანგეთსა და ისრაელთან ერთად საქართველოსაც შეეხო, იმის ნიშანია, რომ აშშ ჩვენ გვერდით დგას, რისთვისაც მე მაიკ პომპეოს მადლობა გადავუხადე. ძალიან მნიშვნელოვანია ასევე ის, რომ პანდემიის ფონზე აშშ-მა ეკონომიკური მხარდაჭერა და სამომავლოდ ჩვენ მივიღოთ ვაქცინები, როგორც კი ის იქნება მზად. ძალიან მნიშვნელოვანია, რომ აშშ ამ რეგიონში უფრო აქტიური ჩართულობის აუცილებლობას ხედავს. პომპეოს განცხადებები ყარაბაღის საკითხზე და ჰუმანიტარული დახმარება არის ნიშანი იმისა, რომ ამ სამშვიდობო პროცესში აშშ-იც იქნება ჩართული. ჩვენი ყველაზე მტკივნეული საკითხის – ოკუპირებული ტერიტორიების მიმართ აშშ-მა კიდევ ერთხელ გამოხატა თავისი მტკიცე მხარდაჭერა და მზადყოფნა იმისთვის, რომ მოლაპარაკებები და სამშვიდობო პროცესი განახლდეს და გაძლიერდეს. ეს ყველაფერი ნიშნავს მეტ ამერიკას საქართველოში, რეგიონში. საქართველო რჩება რეგიონში ამერიკის პოლიტიკის მთავარ დასაყრდენად“, – განაცხადა პრეზიდენტმა.
.jpg)