აღნიშნეთ შობის დღეები თურქეთში

გაეროს მსოფლიო ტურიზმის ორგანიზაციის (UNWTO) შეფასებით, ყოველწლიურად 300-დან 330 მილიონამდე ადამიანი მოგზაურობს რელიგიური ადგილების მონახულების მიზნით, სადაც ისინი    მსოფლიოს ყველაზე მნიშვნელოვან წმინდა ადგილებს სტუმრობენ.  ბოლო წლებში პერსონალიზებული რელიგიური გამოცდილების ზრდამ კიდევ უფრო გააძლიერა ეს სეგმენტი, რაც მიუთითებს ამ მოგზაურობების მნიშვნელობაზე.   თურქეთი, რომელმაც ისტორიის განმავლობაში უამრავ  კულტურას უმასპინძლა, ტურისტებს შთამბეჭდავი "რელიგიურ " მარშრუტებს სთავაზობს, განსაკუთრებით კი ქრისტიანული მემკვიდრეობებისა და წმინდა ადგილების მონახულების კუთხით.   იზნიკიდან, სადაც პაპმა ლეო XIV-მ პირველი საერთაშორისო ვიზიტი განახორციელა, კაპადოკიამდე — ადრეული კლდეში ნაკვეთი ეკლესიებით, და ანტალიამდე — წმინდა ნიკოლოზის (სანტა კლაუსის) ეკლესიით, თურქეთი სავსეა ქრისტიანული ტრადიციით დაინტერესებული მოგზაურებისთვის  თავისი იდეალური ადგილებით.

შვიდი ეკლესიის ისტორიულ-სულიერი გზა

შვიდი ეკლესიის ისტორიულ-სულიერი გზა, რომლებიც დღემდე მნიშვნელოვან პილიგრიმობის ცენტრებს წარმოადგენს და თანამედროვე თურქეთის ეგეოსის რეგიონში — იზმირში, მანისასა და დენიზლიშია განლაგებული, შობისთვის  შესანიშნავ მარშრუტს გთავაზობთ.

ამ მარშრუტზე დღემდე შემორჩენილია ძველი ქალაქებისა და ეკლესიების ნაშთები, ხოლო ზოგიერთი მათგანი თანამედროვე თურქული ქალაქების ნაწილადაა ქცეული. სულიერ მნიშვნელობასთან ერთად, მარშრუტი სტუმრებს საშუალებას აძლევს, შეიგრძნონ ეგეოსის დახვეწილი ცხოვრების სტილი, მდიდარი  კულტურული მემკვიდრეობა, მშვიდი ბუნება და გამორჩეული კულინარიული ტრადიციები.

ქრისტიანული მემკვიდრეობის კვალდაკვალ იზმირში

სულიერი მოგზაურობა შეგიძლიათ დაიწყოთ იუნესკოს მსოფლიო მემკვიდრეობის ძეგლის — ეფესოს მონახულებით, რომელიც თურქეთის ეგეოსის რეგიონის მარგალიტად ითვლება. როგორც მნიშვნელოვანი რომაული ქალაქი, ეფესო ძლიერი ქრისტიანული თემით გამოირჩეოდა და დროთა განმავლობაში ქრისტიანობა ქალაქის მთავარ რელიგიად იქცა. ითვლება, რომ ეფესო ღვთისმშობლის უკანასკნელი განსასვენებელია. აქ შეგიძლიათ მოინახულოთ ღვთისმშობლის სახლი და წმინდა იოანეს ბაზილიკა — აგებული მოციქულის სამარხზე აღმოსავლეთ რომის პერიოდში.

 

იზმირში მეორე გაჩერებაა  სმირნა —   მდიდარი ანტიკური ქალაქი, რომელიც ხშირად ეფესოსაც კი ეჯიბრებოდა. მიუხედავად იმისა, რომ ძველი სმირნა დღეს თანამედროვე იზმირს შეუერთდა, მისი აგორა კი ქემერალთის უბანში კვლავ ჩანს, ხოლო აღმოჩენილი არტეფაქტები იზმირის არქეოლოგიურ მუზეუმშია გამოფენილი.

ქალაქში თქვენი ბოლო გაჩერება იქნება  იუნესკოს მსოფლიო მემკვიდრეობის ძეგლი პერგამონი. ეს იყო შთამბეჭდავი ცივილიზაციის ცენტრი, სადაც გამოიგონეს პერგამენტი და შეიქმნა ალექსანდრიის ბიბლიოთეკის შემდეგ ყველაზე დიდი ბიბლიოთეკა, ასევე ასკლეპიონი — ანტიკური სამყაროს ერთ-ერთი უდიდესი სამკურნალო ცენტრი. აქვე, აუცილებლად უნდა ნახოთ სერაპისის ტაძარი, ცნობილი როგორც „წითელი ბაზილიკა“ და ბერგამას მუზეუმი.

წმინდა ადგილები მანისაში

  შემდეგი გაჩერება მეზობელი ქალაქი მანისაა, რომელიც იზმირის მსგავსად, სამი მნიშვნელოვანი რელიგიურ-ისტორიული ძეგლით გამოირჩევა. პირველი მათგანია თიატირა — ქალაქი, რომელიც ბრინჯაოს ხელოსნობითა და ქსოვის კულტურით  იყო ცნობილი.   მეორე გაჩერებაა სარდისი, რომელიც წელს იუნესკოს მსოფლიო მემკვიდრეობის სიაში შევიდა. აღსანიშნავია, რომ სარდისში კარგად არის შემონახული  რომაული ნაგებობები, მათ შორის აბანო-გიმნაზიუმის კომპლექსი, აკროპოლი და არტემიდას ტაძარი. მანისაში ბოლო გაჩერებაა ფილადელფია. მიუხედავად იმისა, რომ ძველი ქალაქის დიდი ნაწილი დღეს ალაშეჰირის ქვეშაა მოქცეული, აქ კვლავ შეიძლება იხილოთ მნიშვნელოვანი ნაშთები, მათ შორის წმინდა იოანეს ეკლესიის ნანგრევები.

ლაოდიკიას რელიგიური მემკვიდრეობა დენიზლიში

წმინდა იოანეს ბოლო წერილი ლაოდიკიას ეკლესიას ეძღვნებოდა, რომელიც თანამედროვე დენიზლის ჩრდილოეთით, ფამუქქალეს გზაზე მდებარეობს. ლაოდიკია დაარსდა სელევკიდ მეფე ანტიოქოს II თეოსის მიერ, მისი მეუღლის — დედოფალ ლაოდიკეს სახელზე, ჩვენს წელთაღრიცხვამდე III საუკუნეში. ადრეულ აღმოსავლეთ რომის პერიოდში ლაოდიკეას ეკლესიამ ქალაქი მეტროპოლიტურ რელიგიურ ცენტრად აქცია.

დღეს აქ შეგიძლიათ ნახოთ ეკლესიის ნაშთები, ანატოლიის უდიდესი სტადიონი, თეატრები, აგორები, ტაძრები და სხვა მნიშვნელოვანი ნაგებობები. ანტიკური ქალაქის მონახულების შემდეგ აუცილებლად ეწვიეთ იუნესკოს მსოფლიო მემკვიდრეობის ძეგლებს — ჰიერაპოლისსა და ფამუქქალეს, სადაც ტრავერტინები ბამბის ველს წააგავს.