შინაგან საქმეთა სამინისტრო ადამიანის სუნის კვალზე მომუშავე და ნარკოტიკული საშუალებების აღმოჩენაზე წინასწარ გაწვრთნილი ძაღლების, მათი აღჭურვილობისა და შსს-ს თანამშრომლებისთვის კინოლოგის სასწავლო კურსის (საერთაშორისო სერტიფიცირებით) შესყიდვას გამარტივებული წესით ითხოვს.
შესყიდვის დოკუმენტების მიხედვით, სამინისტრო გეგმავს ჯამში 15 ძაღლის შეძენას, საიდანაც 5 იქნება ადამიანის სუნის კვალზე მომუშავე, ხოლო 10 ნარკოტიკული საშუალებების აღმოჩენაზე გაწვრთნილი.
ამასთან, დაგეგმილია ძაღლებისთვის განკუთვნილი გალიების, წყლის თასების, ბურთების, საბმელების, ჯაგრისებისა და სხვა ინვენტარის შეძენა. ჯამში, შესყიდვის ღირებულება 241272 ევროს შეადგენს (17 სექტემბრის მოქმედი კურსით 771 563 ლარი).
„უკანასკნელ პერიოდში მსოფლიოში განვითარებული მოვლენებიდან გამომდინარე, შს სამინისტრო დადგა ახალი გამოწვევების წინაშე, მათ შორის ერთ-ერთ უმთავრეს გამოწვევას წარმოადგენს ქვეყანაში ნარკოტიკული საშუალებების შემოსვლა და ქვეყნის შიგნით მისი გავრცელება.
აღნიშნულ გამოწვევებს შს სამინისტრო მაქსიმალურად უმკლავდება არსებული ძალებით, თუმცა, გაზრდილი მასშტაბებიდან გამომდინარე აუცილებელია შს სამინისტროს მიერ დროულად იქნას გადადგმული შესაბამისი ნაბიჯები.
შს სამინისტროში არსებული ძაღლების გარკვეული ნაწილი ასაკშია, მიუხედავად იმისა რომ ისინი დღეისთვის ასრულებენ მათზე დაკისრებულ მოვალეობას, აღნიშნულ ძაღლებს უჭირთ არსებულ გამოწვევებთან გამკლავება, ვინაიდან ასაკის მატებასთან ერთად მცირდება ძაღლების მიერ ახალი მეთოდების ათვისების უნარიც.
მოცემულ ეტაპზე შს სამინისტროს მიერ დაგეგმილია სწორედ იმ ძაღლების შესყიდვა, რომლებიც გაწვრთნილები არიან წინასწარ თანამედროვე მეთოდებით და აქვთ სიახლეებთან ადაპტაციის უკეთესი უნარები“, - აღნიშნულია შესყიდვის დოკუმენტებში.
რაც შეეხება ვადებს, მიმწოდებელმა სპეციალურად გაწვრთნილი ძაღლებისა და აღჭურვილობის მიწოდება ავანსის ჩარიცხვიდან 60 დღის ვადაში უნდა უზრუნველყონ. ტრენინგ კურსის ხანგრძლივობა 10 დღეს შეადგენს.
