“კოალიცია ცვლილებისთვის“ ერთ-ერთ ლიდერს, ნიკა მელიას, რომელსაც საქართველოს პარლამენტის დროებითი საგამოძიებო კომისიის მოთხოვნის შეუსრულებლობას ედავებიან, აღკვეთის ღონისძიების სახით 50 000-ლარიანი გირაო შეეფარდა.
აღნიშნული გადაწყვეტილება თბილისის საქალაქო სასამართლოს მოსამართლემ, ლელა მარიდაშვილმა მიიღო. მან ბრალდებულს გირაოს გადახდის ვადად 30 დღე განუსაზღვრა.
როგორც პროკურორი ნათია თათიაშვილი საკუთარ შუამდგომლობაში აღნიშნავდა, მელიას მხრიდან მიმალვისა და ახალი დანაშაულის ჩადენის საფრთხე არსებობს. პროკურორის განმარტებით, ბრალდებული წარსულში აღნიშნული ქმედებებიდან გამომდინარე, გულგრილია კანონით გათვალისწინებულ ვალდებულებებზე.
ამასთან, პროკურორის განმარტებით, მათ ბრალდებულის ქონებრივი მდგომარეობის შესწავლით დაასკვნეს, რომ 50 000-ლარიანი გირაო არის თანხა, რომლის გადახდასაც ნიკა მელია შეძლებს. ბრალდების მხარე მიიჩნევს, რომ გირაოს თანხის ოდენობას უნდა ჰქონდეს შემაკავებელი ფაქტორი, ამ შემთხვევაში 50 000-ლარის ოდენობით. გადახდის ვადად კი განესაზღვროს - 30 დღე.
შუამდგომლობას არ დაეთანხმა დაცვის მხარე. ნიკა მელიას ადვოკატის გიორგი კონდახაშვილის თქმით, საგამოძიებო კომისია გადაქცეულია "პროპაგანდის ინსტრუმენტად". ადვოკატის თქმით, ნიკა მელიას საჯაროდ დანაშაულიც არ ჩაუდენია, რადგან "არაკონსტიტუციური ორგანოს მოთხოვნა" ვერ ჩაითვლება სისხლის სამართლის დანაშაულად. ამასთან, როგორც გიორგი კონდახაშვილმა განაცხადა, მიმალვის საფრთხე ჰიპოთეზურია. ადვოკატის თქმით, ნიკა მელიას წარსულში არანაირი კანონი არ დაურღვევია. მას წარსულში დაკისრებული გირაო ევროკავშირმა გადაუხადა, ამიტომ გირაოს დარღვევა არასდროს ყოფილა ნიკა მელიას მხრიდან. ამასთან, კონდახაშვილის თქმით, საქმეზე აღკვეთის ღონისძიების გამოყენების არც ფორმალური და არც ფაქტობრივი საფუძვლები არ არსებობს.
İpn
