NATO Parlament Assambleyasının nümayəndə heyətinin rəhbəri Gürcüstanda keçirilən seçkiləri belə qiymətləndirib
"Gərgin, dərin qütbləşmiş mühit, seçki məntəqələrindən kənarda seçicilərə hədə-qorxu və təzyiqlər, seçici gizliliyinin pozulması, qeyri-bərabər oyun şəraiti və bölücü ritorika - bunlar şəxsən məni narahat edən məsələlərdir".
InterPress.ge xəbər verir ki, bu qiymətləndirməni NATO Parlament Assambleyasının nümayəndə heyətinin rəhbəri Faik Öztrak oktyabrın 26-da keçirilən parlament seçkilərini dəyərləndirərkən deyib.
Öztrakın sözlərinə görə, bu seçkilər Gürcüstanın demokratiyası üçün kritik sınaq olub və onun nəticələri ikinci sınaq olacaq.
“Gürcüstan-NATO tərəfdaşlığı 25 il əvvəl başlayıb. Bu, bizim mühüm tərəfdaşlıqlarımızdan biridir. Biz Gürcüstanda demokratiya, Aİ və NATO-ya dəstək baxımından çempion olmuşuq.
Ortaq dəyərlərə, yəni fərdi azadlıq, demokratiya və qanunun aliliyinə gəlincə, bu, həqiqətən bir ölkənin NATO-ya üzv olması üçün zəruri şərtdir. Bu, Aİ üçün də vacibdir.
2022-ci ilin fevralında, Ukraynaya qarşı müharibə başlayandan sonra Gürcüstanı dəstəkləmək üçün səylərimizi ikiqat artırdıq. Həmçinin açıq şəkildə qeyd etdik ki, Gürcüstan çox mühüm yol ayrıcında dayanır.
Biz açıq şəkildə bildirdik ki, “Xarici təsirin şəffaflığı haqqında” qanun demokratiyanın möhkəmlənməsi yolunda geri addımdır. Bu seçki Gürcüstanın demokratiyası üçün daha bir kritik sınaq oldu - onun nəticələri ikinci sınaq olacaq. Ona görə də bu seçkiləri müşahidə etmək qərarına gəldik və dəvət alanda da dəvəti qəbul etdik.
Avropa İttifaqında və NATO-da demokratik Gürcüstan istəyən gürcü xalqını dəstəkləyirik. Gürcüstan demokratik islahatlar yolunda böyük çətinliklərlə üzləşir. NATO Parlament Assambleyasının bir daha demokratik dayanıqlılıq mərkəzinin yaradılmasının vacib olduğunu və bunun NATO-nun mənzil-qərargahında baş verməli olduğunu qeyd etməsinin səbəbi budur".
