ხალხს კიდევ ერთხელ ვთხოვთ, რომ ხვალ, დილის 9:00 საათზე, პარლამენტთან მოვიდნენ, რადგან მნიშვნელოვანია, რომ პარლამენტის შენობაში „ქართულ ოცნებას“ მოქალაქეების ხმა ფიზიკურადაც ესმოდეს , - ამის შესახებ პარტია „ლელოს“ დეპუტატმა, ანა ნაცვლიშვილმა განაცხადა.
როგორც მან ე.წ. უცხოური გავლენის აგენტების შესახებ კანონთან დაკავშირებით, ოპოზიციონერი პოლიტიკოსებისა და არასამთავრობო სექტორის წარმომადგენლების შეხვედრის შემდეგ აღნიშნა, შეიქმნება საკოორდინაციო საბჭო, სადაც გეგმებსა და სტრატეგიებს შეიმუშავებენ.
„ამ კანონის წინააღმდეგ, პოლიტიკოსებისა და საზოგადოების ერთიანმა ძალისხმევამ შედეგი გამოიღო. ეს უნდა გაგრძელდეს, რადგან ამას პოტენციალი აქვს. ჩვენ ეს პოტენციალი საქართველოს ევროატლანტიკური კურსის დასაცავად უნდა გამოვიყენოთ. არანაირი არგუმენტი, რაც დღეს ისმოდა, არ მიიღება. ეს არის რუსული კანონი და მისი მიღებით აპირებენ საქართველო მეორედ გაასაბჭოონ.
შეხვედრაზე გადავწყვიტეთ, რომ საკოორდინაციო საბჭო შევქმნათ, სადაც გეგმებსა და სტრატეგიებს ერთობლივად შევიმუშავებთ. ხვალ, მოქალაქეებს კიდევ ერთხელ ვთხოვთ, რომ დილის 9:00 საათზე პარლამენტთან მოვიდნენ. 10:00 საათზე იქნება ბიუროს სხდომა და ძალიან მნიშვნელოვანია, რომ პარლამენტის შენობაში „ქართულ ოცნებას“ მოქალაქეების ხმა ფიზიკურადაც ესმოდეს. პროტესტს სხვადასხვა ფორმა ექნება. ეს იქნება მულტიფუნქციური პროტესტი ქუჩაშიც, პარლამენტშიც, საერთაშორისო ტრიბუნებზეც. რაც ყველაზე მნიშვნელოვანია, მაქსიმალურ ძალისხმევას გავწევთ, რათა ინფორმაცია, იმ საფრთხის შესახებ, რაც ამ კანონით „ქართულმა ოცნებამ“ დაგეგმა, საქართველოს თითოეულ მოქალაქემდე მივიტანოთ“, - განაცხადა ანა ნაცვლიშვილმა.
İpn.ge
