მივმართავ იმ ადამიანებს, ვისაც არ გჯერათ, რომ კოვიდი არსებობს - თუ თქვენ არ გჯერათ, მოდი, ვისაც სჯერა იმ ადამიანებს მოუფრთხილდით, -ამის შესახებ დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელმა ხათუნა ზახაშვილმა განაცხადა. მისი თქმით, თუ წესების დარღვევა დაიწყება, მშვიდი ეპიდსიტუაციის შენარჩუნება ვერ მოხერხდება. ზახაშვილმა მოსახლეობას მოუწოდა ნუ აყვებიან კორონავირუსთან დაკავშირებულ არასწორ პროპაგანდას.
„მოქალაქეობრივი ვალის, მოქალაქეობრივი თანადგომის, ადამიანური გაფრთხილების გამო მაინც ატარეთ ეს ნიღაბი. მერწმუნეთ, არავინ არ არის მოწადინებული გაავრცელოს ცრუ ინფორმაცია. ნუ აყვებით არასწორ პროპაგანდასა და არასწორ ინფორმაციებს. კოვიდი მსოფლიო საფრთხეა. ეს არ არის საფრთხე მხოლოდ საქართველოსთვის ან მხოლოდ ერთი ავტობუსის მგზავრებისთვის და ძალიან გთხოვთ, გაუწიეთ ანგარიში, თუ თქვენს ჯანმრთელობას არ უფრთხილდებით, მოუფრთხილდით სხვის ჯანმრთელობას. იმ სხვა ადამიანების ხათრით მაინც ატარეთ ნიღაბი, ვინც თქვენ გარშემო არიან და მათ სჯერათ, რომ კოვიდი არსებობს და რისკები ექმნება მათ ჯანმრთელობას. ნიღბის ტარება არის გარდაუვალი საჭიროება იმისთვის, რომ ჩვენს ქვეყანაში შენაჩუნებული იყოს ასეთი მდგრადი, წყნარი ეპიდემიოლოგიური სიტუაცია,“- განაცხადა ხათუნა ზახაშვილმა.
წყარო: İPN
