უკრაინაში რუსული აგრესია გრძელდება. განსაკუთრებით რთულია ვითარება ქვეყნის აღმოსავლეთ ფრონტზე. საოკუპაციო ძალებმა გასული დღე-ღამის განმავლობაში საავიაციო იერიშები გაააქტიურეს ხარკოვის მიმართულებით. უკრაინის შეიარაღებული ძალების ცნობით, რეგიონს „ეს 300“ ტიპის რუსული რაკეტები ბელგოროდიდან ესროლეს. სამიზნეში ისევ სამოქალაქო ინფრასტრუქტურა მოექცა. საბრძოლო მოქმედებების ეპიცენტრად რჩება დონბასისა და დონეცკის ოლქები.
რეგიონში საცხოვრებელი სახლებისა და საავადმყოფოს დაბომბვაში მხარეები ისევ ერთმანეთს ადანაშაულებენ. კვლავ იბომბება ხერსონის ოლქი.
„ერთ დღეში რუსეთმა ხერსონს 16-ჯერ გაუხსნა ცეცხლი და ასე გრძელდება ყოველდღე. დღეს დარტყმები იყო ხარკოვის ოლქზეც. დონბასში, ისევე როგორც გასულ კვირებში, ახლაც გრძელდება რუსეთის ძალადობრივი თავდასხმა. ოკუპანტები ყველა არსებული ძალით უტევენ. ისინი ვერ ამარცხებენ ჩვენს არმიას და ამიტომ ფიზიკურად ანადგურებენ ყველა ქალაქსა და სოფელს, რათა არ დარჩეს შენობები და კედლებიც კი თავდაცვისთვის. ერთადერთი გზა ამის შესაჩერებლად არის რუსეთის იძულება, ნაბიჯ-ნაბიჯ დაიხიოს უკან და დატოვოს უკრაინული მიწა. ამისთვის აუცილებელია რუსეთზე წნეხის შენარჩუნება. უნდა მოიძებნოს ახალი გზები, რათა ყველა რუსმა ტერორისტმა, ყველა რუსმა ოლიგარქმა, რომლებიც ეხმარებიან ტერორისტ სახელმწიფოს, ყველა რუსმა ოფიციალურმა პირმა და პროპაგანდისტმა პასუხი აგოს ყველაფრისთვის, რასაც სჩადიან უკრაინის და ზოგადად, თავისუფლების წინააღმდეგ“, - განაცხადა უკრაინის პრეზიდენტმა, ვოლოდიმირ ზელენსკიმ.
(წყარო: იმედი)
