თუ სასამართლო მიხეილ სააკაშვილს ციხეში ჩატოვებს, ქუჩის პროტესტს ალტერნატივა არ ექნება, - ამის შესახებ „ნაციონალური მოძრაობის“ თავმჯდომარეობის კანდიდატმა, გიორგი მუმლაძემ „ნაციონალური მოძრაობის“ ოფისში განაცხადა, სადაც ყოფილი პრეზიდენტის მიხეილ სააკაშვილის საკითხზე და სამომავლო გეგმებზე იმსჯელეს.
მისივე თქმით, თანხმდებიან, რომ „მიხეილ სააკაშვილს ციხეში არ მოაკვლევინებენ".
„9 დეკემბერს მაქსიმალურად სოლიდარულები და მობილიზებულები უნდა ვიყოთ, რათა მთელ ქვეყანას და საერთაშორისო საზოგადოებას ვაჩვენოთ ერთიანობა, რომ არ მოვაკვლევინებთ მესამე პრეზიდენტს. 9 დეკემბერი უნდა გახდეს პროცესების დაწყების ათვლის წერტილი. ჩვენ პარალელურად ველოდებით სასამართლოს გადაწყვეტილებას, თუმცა, ამის პარალელურად ვახდენთ მაქსიმალურ მობილიზებას იმისთვის, რომ თუ სასამართლო გადაწყვეტს, სასიკვდილო განაჩენი გამოუტანონ და ჩატოვონ ციხეში, ამის შემდეგ უნდა გადაერთოს მთელი პარტია ბიძინა ივანიშვილის იძულების კამპანიაზე.
მე შევთავაზე, რომ ეს მოხდეს. თუ სასამართლო მიხეილ სააკაშვილს ჩატოვებს ციხეში, ქუჩის პროტესტს ალტერნატივა არ ექნება. ეს იყო ჩემი პოზიცია.
პარტიის უმრავლესობაში ვთანხმდებით, რომ მიხეილ სააკაშვილს ციხეში არ მოვაკვლევინებთ. ეს არის ჩვენი შეთანხმების მთავარი მიზანი. ვინ, როგორ და რანაირად შევძლებთ ამას, გამოაჩენს სასამართლო პროცესები. ეს პროცესი უნდა წარიმართოს, როგორც „ნაციონალური მოძრაობის“ შიგნით კოორდინირებით, ისე მიხეილ სააკაშვილთან და მის ოჯახთან კოორდინირებით“,- აღნიშნავს მუმლაძე.
(ipn)
