ევროკავშირის ლიდერებმა მიანიჭეს კანდიდატის სტატუსი უკრაინას და მოლდოვას, დაადასტურეს, რომ მიანიჭებენ ამ სტატუსს საქართველოს, როდესაც კომისიის რეკომენდაციები შესრულდება, – ამის შესახებ ევროკავშირის გაფართოების საკითხებში ევროკომისარმა, ოლივერ ვარჰეიმ განაცხადა ევროპარლამენტში გამართული სხდომის დროს, სადაც ევროკავშირის გაფართოების ახალი სტრატეგია განიხილეს.
მისი თქმით, ევროკავშირის გაფართოება ყველაზე წარმატებულ ინსტრუმენტად რჩება საგარეო პოლიტიკაში.
„ევროკავშირის გაფართოების პოლიტიკა დაფუძნებულია კრიტერიუმების და სტანდარტების დაკმაყოფილებაზე. გაფართოების პოლიტიკა დაფუძნებულია დამსახურების პრინციპზე მიღებულ გადაწყვეტილებაზე და ეს არის ჩვენი გეოპოლიტიკური ინტერესი.
ივნისში ევროკავშირის სამიტზე ორგანიზაციის წევრი ქვეყნების ლიდერებმა აღიარეს უკრაინის, მოლდოვას, საქართველოს ევროპული პერსპექტივა. ლიდერებმა კანდიდატის სტატუსი მიანიჭეს უკრაინასა და მოლდოვას. ლიდერებმა დაადასტურეს, რომ მიანიჭებენ კანდიდატის სტატუსს საქართველოსაც ევროკომისიის მიერ წარმოდგენილი 12 რეკომენდაციის შესრულების შემდეგ. ევროკავშირის ლიდერებმა ურყევი მხარდაჭერა დააფიქსირეს დასავლეთ ბალკანეთის ქვეყნების მიმართაც“, - განაცხადა ოლივერ ვარჰეიმ.
